Հաագայի դատարանի դատախազը պահանջում է ձերբակալել Հարավային Օսիայի 3 նախկին պաշտոնյայի

Loading...

Միջազգային քրեական դատարանի գլխավոր դատախազը պահանջում է ձերբակալել Հարավային Օսիայի նախկին երեք պաշտոնյաների, որոնք կարող էին առնչություն ունենալ 2008 թվականի ռուս-վրացական պատերազմի ընթացքում տեղի ունեցած հանցագործություններին։

Դատարանի գլխավոր դատախազ Քարիմ Խանը նախօրեին տեղեկացրել է, որ ձերբակալության օրդերները հաստատելու խնդրանքով դիմել է դատավորներին։ Հստակ չէ, սակայն, թե դատարանի կողմից այդ օրդերները հաստատվելու դեպքում ինչպես և ում կողմից է իրականացվելու ձերբակալությունը։

Քարիմ Խանի խոսքով՝ Հարավային Օսիայի ուժային կառույցների նախկին բարձրաստիճան պաշտոնյաները մասնավորապես կասկածվում են պատերազմի ընթացքում վրացի խաղաղ բնակիչների անօրինական կալանքների, դաժան վերաբերմունքի, պատանդ վերցնելու և հետագայում ապօրինի տեղափոխման մեջ։

Հաագայի դատարանի գլխավոր դատախազը նաև նշում է, որ հետաքննությունը բացահայտել է Ռուսաստանի զինված ուժերի գեներալ-մայոր և օդադեսանտային ուժերի հրամանատարի տեղակալ Վյաչեսլավ Բորիսովի ենթադրյալ դերը։ Նա, ըստ քննիչների, դիտավորյալ նպաստել է վերը նշված որոշ հանցագործությունների կատարմանը։

Բորիսովը մահացել է 2021 թվականին։

“24 saat”

Bənzər məqalələr

Թողնել պատասխան

Ձեր էլ-փոստի հասցեն չի հրապարակվելու։

Back to top button