Ռուսաստանի Դաշնությունը դուրս եկավ Եվրոպայի խորհրդից:
Այդ մասին արտաքին գործերի նախարար Սերգեյ Լավրովի պաշտոնական ծանուցումը փոխանցվել է Եվրոպայի խորհրդի գլխավոր քարտուղար Մարիա Պեյչինովիչ-Բուրիչին:
Ռուսաստանի արտաքին գերատեսչությունը նշել է, որ «Եվրոպայի խորհրդում մեծամասնություն կազմած ՆԱՏՕ-ի և Եվրամիության երկրները չարաշահում են այդ հանգամանքը և հետևողականորեն կազմակերպությունը վերածում են հակառուսաստանյան քաղաքականության գործիիք»:
Նախարարությունը նշում է, որ Եվրոպայի խորհուրդը փետրվարի 25-ին ընդունել է կազմակերպության կանոնադրական կառույցներում Ռուսաստանի ներկայությունը «սառեցնելու խտրական որոշումը»:
«Այդ պայմաններում մեր երկիրը չի մնա Եվրոպայի խորհրդում: Մարտի 15-ին գլխավոր քարտուղար Մարիա Պեյչինովիչ-Բուրիչին կփոխանցվի մեր ծանուցումը Եվրոպայի խորհրդից դուրս գալու մասին»,- ասվում է ՌԴ ԱԳՆ-ի հաղորդագրությունում:
Ռուսական կողմը նշում է, որ պատրաստ է «բաց, գործնական և իրավահավասար կապեր պահպանել Եվրոպայի խորհրդի երկրների հետ»:
Մոսկվան ընդգծում է, որ Եվրոպայի խորհրդից Ռուսաստանի դուրս գալու բոլոր հետևանքների, ինչպես նաև մայրցամաքում մարդասիրական-իրավական ընդհանուր տարածքի քայքայման համար «ամբողջ պատասխանատվությունը կրելու են նրանք, ովքեր ստիպել են Ռուսաստանին դիմել այդ քայլին»:
