Այսօր ՆԱՏՕ-ում հատուկ նիստ է նախատեսված Ուկրաինայի հարցով, ԱՄՆ նախագահ Ջո Բայդենը ժամանել է Բրյուսել։ Հաղորդվում է, որ նա առիթը կօգտագործի Մոսկվայի դեմ ավելի շատ պատժամիջոցներ հայտարարելու համար:
Interfax-Ukraine-ի փոխանցմամբ՝ Հյուսիսատլանտյան դաշինքի գագաթնաժողովում ելույթ կունենա նաև Ուկրաինայի նախագահ Վլադիմիր Զելենսկին։ Լրատվական գործակալությունը մեջբերել է Զելենսկու մամուլի քարտուղար Սերհիյ Նիկիֆորովի խոսքերը, որ Ուկրաինան «ակտիվորեն կմասնակցի» այսօրվա գագաթնաժողովին։ Նվազագույն մասնակցությունը, ըստ Նիկիֆորովի, կլինի նախագահի ուղերձը, առավելագույնը՝ «լիարժեք մասնակցությունը, իհարկե՝ տեսաֆորմատով»։
Ուկրաինայի խնդրով գագաթնաժողով կանցկացնի նաև Եվրամիությունը, Մեծ յոթնյակի երկրների ղեկավարները նույնպես այսօր կհանդիպեն Բելգիայի մայրաքաղաքում։
Ակնկալվում է ԱՄՆ նախագահի մամուլի ասուլիսը, որից հետո նա կմեկնի Լեհաստան, որն ընդունել է ուկրաինացի փախստականների մեծ մասին։
Հաղորդվում է, որ Բայդենն այսօր կխոսի նաև ռուսական նավթի և բնական գազի մատակարարումից կախում ունեցող Եվրոպայում էներգետիկ անվտանգության ամրապնդման համատեղ գործողության մասին։
