Ռուսաստանի նախագահ Վլադիմիր Պուտինի խորհրդական, Ուկրաինայի հետ բանակցություններում ռուս բանագնացների թիմի ղեկավար Վլադիմիր Մեդինսկին մարտի 24-ին առաջարկել է Դաշնության դպրոցներում «առավոտյան աղոթել ի փառս Ռուսաստանի»:
Մեդինսկին պնդում է, որ նման պարտադիր աղոթք կա նաև Միացյալ Նահանգներում:
Այդ մասին Մեդինսկին ասել է միջգերատեսչական հանձնաժողովի նիստում, որի օրակարգում պատմական և հայրենասիրական կրթության թեման էր:
Նա պնդել է, թե Միացյալ Նահանգներում բոլոր պետական և մասնավոր դպրոցներում 150 տարի շարունակ ուսումնական օրը սկսվում է Ամերիկայի, դրա սիմվոլների և դրոշի համար կարճ աղոթքով:
«Պետք է փոխանակել երկրի, դրա պետական սիմվոլների և դրոշի համար աղոթելու ավանդույթը»,- հայտարարել է Մեդինսկին, ով ժամանակին զբաղեցրել է նաև Ռուսաստանի մշակույթի նախարարի պաշտոնը:
Նա ասել է, թե «հենց այսօրվանից է պետք դպրոցներում սկսել աղոթել» և միջգերատեսչական կոմիտեին կոչ է արել այդ առաջարկով դիմել Ռուսաստանի կրթության նախարարություն:
Միացյալ Նահանգների Գերագույն դատարանը 1962 թվականին արգելել է պարտադիր աղոթքը դպրոցներում:
Պետությունն ուսուցիչներին ընդհանրապես արգելում է աղոթք անել պետական ուսումնական հաստատություններում:
