Ամերիկացի կինոբեմադրիչ, դերասան և պրոդյուսեր Շոն Փենն այսօր Լեհաստանում՝ Ռժեշուվ ավանում այցելել է ուկրաինացի փախստականների կենտրոն:
«Օսկարի» մրցանակի դափնեկիր Փենը հայտնի է որպես քաղաքական ակտիվիստ և բարերար: 2010 թվականին Հայիթիի ավերիչ երկրաշարժից տուժածներին սատարելու համար ստեղծված CORE (Community Organized Relief Effort) հապավումով բարեգործական կազմակերպության համահիմնադիրն է: Այդ կազմակերպությունը երկրաշարժից հետո շարունակել է մոլորակի մյուս շրջաններում կարիքավորներին և աղետյալներին օգնելու առաքելությունը:
Փենը դրանից առաջ՝ 2005 թվականին օգնել է ԱՄՆ-ում «Քաթրին» փոթորկից տուժածներին, ապա 2012 թվականին՝ արդեն որպես CORE-ի ներկայացուցիչ, օգնել է Պակիստանում հեղեղումներից տուժածներին:
Շոն Փենը CORE-ի անունից Ռժեշուվ ավանի ղեկավարների հետ համագործակցության պայմանագիր է կնքել:
«Ես ունեմ ծրագիր՝ մասնակցել մեծ տոնակատարության, երբ Ուկրաինան հաղթի այս պատերազմում: Դա կլինի, նրանք դա կանեն, մենք չգիտենք, թե դեռ ինչքան սարսափելի կորուստներ, անիմաստ կորուստներ և ողբերգություններ կլինեն, բայց մենք գիտենք, որ ուկրաինացիները կհաղթեն»,- ասել է Փենը:
Հոլիվուդի աստղը հենց սկզբից խստորեն դատապարտել է ռուսների ներխուժումը հարևան պետություն:
61-ամյա Փենը ռուսների հարձակման առաջին օրերին Ուկրաինայում սկսել է վավերագրական ֆիլմ նկարահանել պատերազմի մասին, և երբ իրավիճակը շատ վտանգավոր է դարձել, ստիպված իր երկու գործընկերների հետ ոտքով հասել է Լեհաստանի սահման:
Փենը հուզմունքով է խոսել Լեհաստանում ուկրաինացիների հանդեպ դրսևորվող կարեկցանքի և փախստականներին օգնելու անկեղծ ցանկության մասին:
Ֆիլմը, որը նա հիմա նկարահանում է, պետք է արտադրի Vice Studios ամերիկա-կանադական մեդիաընկերությունը:
