Ազգային անվտանգության ծառայությունը հաղորդում է՝ հավաստի օպերատիվ տվյալներ են ստացել, որ Երևանում անցկացվող հավաքի կազմակերպիչները մտադրված են այսօր անցկացվող Ազգային Ժողովի հերթական նստաշրջանի ընթացքում «դրդել հավաքի մասնակիցներին զավթել ԱԺ շենքը և հարկադրել կատարելու որևէ գործողություն՝ այդ կերպ ապակայունացնել երկրի ներքին անվտանգությունը, խաթարել հասարակական կարգն ու անվտանգությունը»:
ԱԱԾ-ն հավաքի կազմակերպիչներին և դրանց մասնակիցներին նախազգուշացնում է՝ ձեռնպահ մնալ հակաօրինական գործողություններ կատարելուց՝ «հակառակ պարագայում կատարվածի ողջ պատասխանատվությունը կրելու են դրանց կազմակերպիչները»:
Ծառայությունը քաղաքացիներին կոչ է անում տուրք չտալ սադրանքներին, զերծ մնալ հակաօրինական քայլեր կատարելուց՝ «հակառակ պայմաններում հավասարապես կիսելու են քրեական պատասխանատվության ողջ բեռը»:
ԱԱԾ-ի հաղորդագրությանը ընդդիմադիրները դեռ չեն արձագանքել։ Նշենք, որ նախորդ օրը խորհրդարանի ընդդիմադիր փոխխոսնակ Իշխան Սաղաթելյանը կարևորել էր այսօրվա ակցիաները, քանի որ վարչապետ Նիկոլ Փաշինյանը ժամը 16-ից Ազգային ժողովում է լինելու, որտեղ կառավարության անդամները պատասխանելու են պատգամավորների հարցերին։ Այդուհանդերձ, դաշնակցական գործիչը չի մանրամասնել՝ ինչ-որ գործողություններ այդ ժամին նախատեսվո՞ւմ են։
Հայաստանի խորհրդարանական ընդդիմությունը ապրիլի վերջից բողոքի ակցիաներ է իրականացնում իշխանափոխության պահանջով, մայիսի 1-ի հանրահավաքում հայտարարվեց այս շաբաթ բողոքի անհնազանդության ակցիաներ սկսելու մասին։