Ուրբաթ օրը Ռուսաստանի, Հայաստանի և Ադրբեջանի փոխվարչապետեր Ալեքսեյ Օվերչուկի, Մհեր Գրիգորյանի և Շահին Մուստաֆաևի համանախագահությամբ եռակողմ աշխատանքային խմբի 10-րդ նիստի ժամանակ կողմերը «քննարկել և hստակեցրել են իրենց մոտեցումները սահմանային, մաքսային և այլ տեսակի հսկողության, ինչպես նաև Հայաստանի և Ադրբեջանի տարածքներով` ճանապարհներով և երկաթգծերով քաղաքացիների, տրանսպորտային միջոցների և բեռների անվտանգ անցման հարցերի շուրջ»։ Այս մասին ասված է Հայաստանի կառավարության հաղորդագրությունում:
Հաղորդագրության համաձայն՝ «հանդիպման ընթացքում տեղի է ունեցել նաև մտքերի փոխանակություն Հայաստանի Հանրապետության տարածքով Ադրբեջանի Հանրապետության արևմտյան շրջանների և Նախիջևանի Ինքնավար Հանրապետության միջև տրանսպորտային կապն ապահովող ավտոմոբիլային ճանապարհի անցման հնարավոր երթուղիների շուրջ»։
«Կողմերը կշարունակեն աշխատանքը տարածաշրջանում տրանսպորտային կապերի ապաշրջափակման վերաբերյալ Հայաստանի Հանրապետության, Ռուսաստանի Դաշնության և Ադրբեջանի Հանրապետության ղեկավարների պայմանավորվածությունների կատարման ուղղությամբ», – նշված է հաղորդագրությունում:
Հանդիպման արդյունքներով Ռուսաստանի կառավարության տարածած հաղորդագրության համաձայն՝ կողմերը «քննարկել և մերձեցրել են մոտեցումները Ադրբեջանի Հանրապետության և Հայաստանի Հանրապետության տարածքներով անցնող ավտոմոբիլային և երկաթուղային ճանապարհներին սահմանային, մաքսային և հսկողության այլ տեսակների, ինչպես նաև քաղաքացիների, տրանսպորտային միջոցների և բեռների անվտանգ անցման հարցերի շուրջ»:
Ռուսական կողմը ևս հաղորդում է Հայաստանի տարածքով Ադրբեջանի արևմտյան շրջանների և Նախիջևանի միջև տրանսպորտային հաղորդակցությունն ապահովող ավտոմոբիլային ճանապարհի հնարավոր երթուղիների քննարկման մասին:
Երեք երկրների փոխվարչապետերի գլխավորած աշխատանքային խմբի հանդիպումը վեցամսյա ընդմիջումից հետո կայացավ երեկ Ռուսաստանի մայրաքաղաքում:
