Ռուսաստանին անհրաժեշտ են տեղեկատվական տեխնոլոգիաների ոլորտի առնվազն 170 000 աշխատակից:
Այդ մասին այսօր Դաշնության խորհրդի սոցիալական քաղաքականության հարցերի հանձնաժողովում ասել է Ռուսաստանի ներքին գործերի փոխնախարար Յուրի Զուբովը:
Նրա խոսքով, մասնագետների պակասի հիմնական պատճառը դարձել է երկրից նրանց արտագաղթը, որը սկսվել է այն բանից հետո, երբ ի պատասխան Ուկրաինայում Ռուսաստանի նախաձեռնած «հատուկ ռազմական օպերացիայի»՝ շատ երկրներ պատժամիջոցներ են սահմանել Ռուսաստանի նկատմամբ:
Զուբովը կոչ է արել ձեռնարկել միջոցներ, որոնք գրավիչ կդարձնեն տեղեկատվական ոլորտի օտարերկրացի մասնագետների տեղափոխումը Ռուսաստան և, մասնավորապես, ազատականացնել արտասահմանցի մասնագետրներին Ռուսաստանում կեցության իրավունք տրամադրելու օրենքը:
Այն վերջերս ընդունվել է Պետական դումայում և հիմա քննարկվում է Դաշնության խորհրդում:
Ռուսաստանի իշխանությունները մինչ այդ չեն ընդունել ՏՏ ոլորտում մասնագետների զանգվածային հեռանալու խնդրի առկայությունը:
Վարչապետ Միխայիլ Միշուստինը մայիսին նույնիսկ պնդել է, որ «այդօրինակ տեղեկությունները հատուկ են դրվում շրջանառության մեջ» և հավաստիացրել, թե «հեռացած մասնագետների 85 տոկոսն արդեն վերադարձել է»:
Զուբովի խոսքով, Ռուսաստանում ՏՏ ոլորտում ներգրավված էր մոտ մեկ միլիոն մարդ: Եթե երկրից հեռացել է նրանցից 170 հազարն, ապա դա կազմում է մասնագետների մոտ 15 տոկոսը: