Խորհրդարանը Սաղաթելյանին և Հակոբյանին հեռացրեց պաշտոններից

Loading...

Ազգային ժողովն այսօր, փակ-գաղտնի քվեարկությամբ, Իշխան Սաղաթելյանին հետ կանչեց Ազգային ժողովի նախագահի տեղակալի պաշտոնից և դադարեցրեց Վահե Հակոբյանի լիազորությունները Տնտեսական հարցերի մշտական հանձնաժողովի նախագահի պաշտոնում։

«107 պատգամավորներից քվեարկությանը մասնակցել է 66 պատգամավոր, որոնք բոլորը երկու դեպքում էլ կողմ էին քվեարկել», -հայտնեց հաշվիչ հանձնախմբի նախագահ Նարեկ Բաբայանը։

Նախքան քվեարկությունը հիմնական զեկուցող, իշխանական պատգամավոր Արուսյակ Ջուլհակյանը տեղեկացրեց, որ 2021 թվականի օգոստոսից առ այսօր գումարվել է թվով 25 նիստ, 25 նիստերից Սաղաթելյանը միայն 7-ին է ներկա եղել՝ բացակայելով նաև Ազգային ժողովի խորհրդի18 նիստերից։

Այսպիսով, ըստ Ջուլհակյանի, հաճախակի բացակայությունների պատճառով Սաղաթելյանը չի կատարել իր անմիջական պարտականությունները։

Հակոբյանի հարցով հիմնական զեկուցող Ծովինար Վարդանյանն էլ նկատեց՝ Ազգային ժողովի 8-րդ գումարման առաջին կիսամյակի ընդհանուր 342 քվեարկություններից Հակոբյանը չի մասնակցել 194-ին, Ազգային ժողովի 8-րդ գումարման ընթացքում հրավիրված խորհրդի 25 նիստերից բացակայել է 20 անգամ, խորհրդարանն 8-րդ գումարման ընթացքում ընդունել է 253 օրենք, որոնցից 83-ի համար գլխադասային է եղել Տնտեսական հարցերի մշտական հանձնաժողովը։

ԱԺ 8-րդ գումարման ընթացքում Տնտեսական հարցերի մշտական հանձնաժողովը կազմակերպել է 27 հերթական և արտահերթ նիստեր, Հակոբյանը նիստերի նախապատրաստման, կազմակերպման աշխատանքներին չի մասնակցել, չի նախագահել թվով 11 նիստ, վերոնշյալ նիստերի օրակարգերն ու արձանագրությունները չի ստորագրել, չի ստորագրել նաև հանձնաժողովում դրական եզրակացություն ստացած օրենքի նախագծերը և մի շարք այլ փաստաթղթեր, տեղեկացրեց Վարդանյանը։

Իշխան Սաղաթելյանն ու Վահե Հակոբյանը նիստին ներկա չեն։

Ավելի ուշ, «Ազատության» հետ զրույցում, Սաղաթելյանը ԱԺ որոշումը քաղաքական հետապնդում որակեց։

“24 saat”

Bənzər məqalələr

Թողնել պատասխան

Ձեր էլ-փոստի հասցեն չի հրապարակվելու։

Back to top button