Ազգային ժողովի ընդդիմադիր «Հայաստան» խմբակցության պատգամավոր Արթուր Ղազինյանը հայտնում է պատգամավորական մանդատը վայր դնելու մասին։ Այդ մասին պատգամավորը գրել է ֆեյսբուքյան իր էջում՝ շեշտելով՝ ստեղծված իրավիճակում դա համարում է ամենաճիշտ ու արդարացված որոշումը:
Ղազինյանը նշել է, որ պատճառների մասին հիմա չի ցանկանում խոսել՝ միևնույն ժամանակ տեղեկացնելով՝ դրանք կրում են բացառապես քաղաքական ու մարտավարական բնույթ։
«Այս պահին կարող եմ միայն ասել, այս ԱԺ-ում որևէ օրակարգով իմ հետագա աշխատանքն այլևս չեմ պատկերացնում, իսկ այդ պայմաններում պահպանել ԱԺ պատգամավորի կարգավիճակը, չեմ կարող. առնվազն ազնիվ չէ», – մասնավորապես գրել է Ղազինյանն՝ ընդգծելով, որ շարունակելու է մասնակցել «Դիմադրության» շարժման բողոքի ակցիաներին:
«Դիմադրության» շարժումն ունի չիրացված ահռելի ներուժ: Այն այս պահին գոյություն ունեցող միակ հարթակն է, որ ի զորու է կանխել նոր դավաճանություններն ու զիջումները», – գրել է պատգամավորը:
