Freedom House իրավապաշտպան կազմակերպությունը ողջունում է Հայաստանում «ծանր վիրավորանքի» ապաքրեականացումը և ԶԼՄ օրենսդրության շուրջ լայն շրջանակների հետ խորհրդակցություններ ունենալու կառավարության հանձնառությունը:
Freedom House-ը նաև հորդորում է Հայաստանի վարչապետին՝ լրջորեն վերաբերվել ԶԼՄ-ների մտահոգություններին և օգտագործել ուղիղ հաղորդակցության ուղիները, ներառյալ բաց և թափանցիկ մամուլի ասուլիսները՝ առողջ ու գործուն ժողովրդավարություն ապահովելու նպատակով:
2018-ի հեղափոխությունից հետո Փաշինյանը ֆեյսբուքյան ուղիղ եթերով էր պարբերաբար պատասխանում քաղաքացիների հարցերին, սակայն 44-օրյա պատերազմից հետո շփման այս մեթոդը նա գրեթե չի կիրառել։ Պատերազմից հետո վարչապետը չորս անգամ առցանց ասուլիս է հրավիրել, չորս անգամն էլ կառավարությունից պահանջել են, որ ասուլիսի համար հարցերը նախօրոք ուղարկվեն: Մի շարք լրատվամիջոցներ, այդ թվում` «Ազատություն» ռադիոկայանը, անընդունելի են համարել այս ձևաչափը՝ այն համարելով «խտրական, ոչ արդյունավետ և հակասող խոսքի ազատության և ժողովրդավարության առանցքային՝ թափանցիկության և հաշվետվողականության սկզբունքներին»։
