Մոսկվայի դեմ պատժամիջոցների շարունակականությունը կարող է հանգեցնել էներգակիրների գների ավելի մեծ աճի եվրոպացի սպառողների համար, պնդում է Ռուսաստանի նախագահ Վլադիմիր Պուտինը։
«Մենք գիտենք, որ եվրոպացիները փորձում են փոխարինել ռուսական էներգետիկ ռեսուրսները», – ասել է Պուտինը հուլիսի 8-ին բարձրաստիճան պաշտոնյաների հետ հեռուստատեսային հանդիպման ժամանակ՝ շարունակելով, – «սակայն, ակնկալվում է, որ նման գործողությունների արդյունքը կլինի գազի գնի բարձրացումը շուկայում և էներգիայի ռեսուրսների արժեքի բարձրացումը վերջնական սպառողների, այդ թվում՝ տնային տնտեսությունների համար»:
Ռուսաստանի նախագահն ասել է, որ ռուսական վառելիքաէներգետիկ համալիրում իրավիճակը մնում է կայուն, և որ պատժամիջոցները շատ ավելի մեծ վնաս են հասցնում դրանք սահմանող երկրներին, քան Ռուսաստանին։
Պատժամիջոցների հետագա կիրառումը կարող է հանգեցնել էլ ավելի ծանր «աղետալի» հետևանքների համաշխարհային էներգետիկ շուկայում, հավելել է Պուտինը։
Արևմտյան երկրները պատժամիջոցներ են սահմանել Ռուսաստանի դեմ փետրվարին Ուկրաինա ներխուժելուց հետո և անշեղորեն ընդլայնում են դրանք:
