Պաշտոնական Թեհրանը չի բացառում Իրանի միջուկային ծրագրի ճակատագրին նվիրված բանակցությունների նոր փուլի անցկացումը մոտ ապագայում։ Այս մասին այսօր, Թեհրանում կայացած ամենշաբաթյա ասուլիսի ժամանակ, հայտարարել է Իրանի արտգործնախարարության պաշտոնական ներկայացուցիչ Նասեր Քանանին։
«Բանակցությունների ժամկետների վերաբերյալ հստակ հետևության մենք կարող ենք հանգել մոտ ապագայում։ Իրանի Իսլամական Հանրապետությունը ողջունում է ցանկացած նախաձեռնություն, որ կարող է նպաստել համաձայնության կայացմանը», – հայտարարել է Իրանի դիվանագիտական գերատեսչության խոսնակը։
Նախօրեին բանակցությունների շուրջ ստեղծված կացությանն անդրադարձել էր նաև դրանցում իրանական պատվիրակությունը ղեկավարող Ալի Բաղերի Քանին՝ ընդգծելով, որ Թեհրանը հանդես է եկել նոր առաջարկներով։
«Մենք առաջարկներ ենք ներկայացրել, որոնք կարող են ճանապարհ հարթել Վիեննայում ընթացող բանակցությունների [վերսկսման] համար։ Մենք պատրաստ ենք բանակցությունները ավարտել սեղմ ժամկետներում, եթե, իհարկե, հակառակ կողմը նույնանման պատրաստակամություն հայտնի», – նշել է իրանցի դիվանագետը։
