Հայաստանի և Ռուսաստանի արտգործնախարարներն այսօր հեռախոսազրույց են ունեցել:
Արարատ Միրզոյանն ու Սերգեյ Լավրովը քննարկել են 2020թ. նոյեմբերի 9-ի, 2021թ. հունվարի 11-ի և նոյեմբերի 26-ի` Հայաստանի, Ադրբեջանի ու Ռուսաստանի միջև եռակողմ հայտարարություններով ձեռք բերված պայմանավորվածությունների կատարման ընթացքը, տարածաշրջանում տիրող անվտանգային իրավիճակը, միջազգային օրակարգի այլ հարցեր, հայտնում է հայկական ԱԳՆ-ն:
Ըստ հաղորդման` երկու երկրների արտաքին քաղաքական գերատեսչությունների ղեկավարներն անդրադարձել են նաև պատերազմի հետևանքով առաջացած հումանիտար խնդիրներին` կարևորելով հայ ռազմագերիների և այլ պահվող անձանց ազատ արձակումը և վերադարձը:
Ռուսաստանի ԱԳՆ-ի համաձայն` Միրզոյանն ու Լավրովը հաստատել են հանձնառությունը` համապարփակ և արդյունավետ կերպով կյանքի կոչելու եռակողմ (Հայաստանի, Ադրբեջանի և Ռուսաստանի) պայմանավորվածությունները, մասնավորապես՝ Հարավային Կովկասում տրանսպորտային և տնտեսական կապերի ապաշրջափակման, հայ-ադրբեջանական սահմանի դելիմիտացիայի, Երևանի և Բաքվի միջև հարաբերությունների կարգավորման հարցերում:
