Ադրբեջանի արտաքին գործերի նախարարությունը հերքել և «կեղծավորություն» է անվանել 2020 թվականի նոյեմբեր 9-ի եռակողմ հայտարարության դրույթները խախտելու մասին Հայաստանի արտաքին գերատեսչության կողմից ներկայացրած մեղադրանքը:
«Հղում անելով եռակողմ հայտարարության 6-րդ կետին, Ադրբեջանին դատապարտող Հայաստանի ԱԳՆ-ին տեղեկացնում ենք, որ Լաչինի միջանցքով նոր ճանապարհի կառուցումը ամիսներ շարունակ իրականացվում է պայմանավորված երթուղով, և հայկական կողմը բավականաչափ տեղեկացված է այդ մասին»,- ասվում է Ադրբեջանի ԱԳՆ-ի հայտարարությունում:
Ադրբեջանի արտաքին գերատեսչությունը պնդում է, որ «եթե հայկական կողմը շարունակի տարբեր պատրվակներով ձգձգել իր պարտավորությունների կատարումն, ապա դա ավելորդ անգամ կվկայի եռակողմ հայտարարության իրականացման վերաբերյալ Հայաստանի ապակառուցողական և քայքայիչ դիրքորոշման մասին»:
Նախարարությունը պնդում է, որ Ադրբեջանն ամբողջությամբ կատարում է իր պարտավորությունները և նույնը Հայաստանից է պահանջում:
Բաքուն նաև հիշեցնում է, թե «Հայաստանը տակավին իր ապօրինի զորամիավորումները չի հեռացրել Ադրբեջանի տարածքից»:
«Ադրբեջանը միանգամայն օրինական ճանապարհով է պաշտպանում իր անվտանգությունը և տարածքային ամբողջականությունը»,- ասվում է հայտարարությունում:
