Անցած ամիս կորոնավիրուսով վարակված Ամերիկայի Միացյալ Նահանգների նախագահ Ջո Բայդենի վերջին ստուգման պատասխանը վերստին դրական է:
Այդ մասին այսօր հայտնել է նախագահի անձնական բժիշկ Քևին Օ՝Քոննորը: Նրա խոսքով, հիվանդության նշանները հետզհետե ավելի թույլ են նկատվում:
«Նախագահն իրեն շատ լավ է զգում, դեռ մի քիչ ունի հազ, բայց վիճակը բարելավվում է»,- ասել է բժիշկը:
Ըստ Օ՝Քոննորի, Բայդենի ճնշումը և ջերմությունը համապատասխանում են նորմային:
«Նրա թոքերը մաքուր են»,- ասել է նախագահի անձնական բժիշկ Քևին Օ՝Քոննորը:
Կորոնավիրուսով ԱՄՆ նախագահ Ջո Բայդենի վարակվելու մասին հաղորդվել է հուլիսի 21-ին, ինչից հետո նա անցել է ինքնամեկուսացման ռեժիմին:
Հուլիսի 30-ին ԱՄՆ նախագահը ստիպված էր նորից վերադառնալ կարանտինի ռեժիմին, քանի որ ստուգումը դրական պատասխան էր տվել: Այս ընթացքում Բայդենը Paxlovid տեսակի դեղամիջոց է ընդունել:
Օ՝Քոննորի փոխանցմամբ, բուժումը վերսկսելու անհրաժեշտություն չկա, բայց բժիշկները կշարունակեն հետևել նախագահի առողջական վիճակին:
Նա նորից կլինի կարանտինի պայմաններում, և դա կտևի մինչև կորոնավիրուսի ստուգման բացասական պատասխանի ստացումը:
Սպիտակ տան փոխանցմամբ, այս ամբողջ ժամանակաշրջանում Բայդենը շարունակել է ամբողջ ծավալով կատարել իր նախագահական պարտականությունները:
