Ադրբեջանում Մեծ Բրիտանիայի գործերի ժամանակավոր հավատարմատարը օգոստոսի 5-ին կանչվել է երկրի արտգործնախարարություն, նրան փոխանցվել է Բաքվի «վճռական բողոքը» Լոնդոնում Ադրբեջանի դեսպանատան վրա իրանցի ծայրահեղական ակտիվիստների հարձակման կապակցությամբ։
«Այդ սադրանքը լրջորեն բացահայտում է դիվանագիտական առաքելության անվտանգության ապահովման խնդիրը, և ընդունող երկիրը պետք է անվտանգության միջոցներ ձեռնարկի իր միջազգային իրավական պարտավորություններին համապատասխան»,- ասվում է Ադրբեջանի դիվանագիտական գերատեսչության հաղորդագրությունում։
Աղբյուրի համաձայն, Բաքուն բրիտանական իշխանություններից պահանջել է «մանրակրկիտ հետաքննել վանդալիզմը և մեղավորներին պատասխանության ենթարկել»։
Պաշտոնական աղբյուրների համաձայն, նախօրեին ծայրահեղական մի խումբ ակտիվիստներ հարձակվել են Մեծ Բրիտանիայում Ադրբեջանի դեսպանատան վրա, կրոնական դրոշներ պարզել և դեսպանատան պատշգամբից ծայրահեղական կոչեր հնչեցրել:
«Ոստիկանությունը վերջիններիս դուրս է բերել շենքից և ձերբակալել: Կատարվածը կհետաքննեն Բրիտանիայի իրավապահ մարմինները, քննության մասին հավելյալ տեղեկություն կտրամադրվի», – հաղորդել է Ադրբեջանի արտգործնախարարությունը։
