Ադրբեջանի գլխավոր դատախազությունը այսօր հայտնել է, որ քրեական գործ է հարուցել կրոնական արմատականների կողմից Լոնդոնում Ադրբեջանի դեսպանատան վրա կատարված հարձակման դեպքով։
Հաղորդվում է, որ գործը հարուցվել է մի շարք հոդվածներով, մասնավորապես՝ միջազգային պաշտպանությունից օգտվող անձանց, կամ կազմակերպության դեմ ոտնձգության, ուրիշի ունեցվածքը վնասելու, Ադրբեջանի դրոշի և զինանշանի նկատմամբ վիրավորական գործողությունների համար։
Բաքուն նաև դիմել է Բրիտանիայի իրավապահներին հետաքննությանը իրավական աջակցություն ցուցաբերելու խնդրանքով։
Օգոստոսի 4-ին Լոնդոնում գործող կրոնական կազմակերպության մի խումբ անդամներ գրավել էին քաղաքի կենտրոնում գտնվող Ադրբեջանի դեսպանատունը՝ բողոքելով Ադրբեջանում որոշ շիա մահմեդականներին հալածելու դեմ։ Բրիտանիայի ոստիկանությունը ութ մարդ է ձերբակալել։
