Ադրբեջանն ու Հայաստանն իրենք են որոշելու խաղաղության պայմանագրի ստորագրման վայրն ու ժամանակը.
Toplum TV-ն հայտնում է, որ դեկտեմբերի 30-ին այս մասին մամուլի հաղորդագրության մեջ ասել է Ռուսաստանի փոխարտգործնախարար Միխայիլ Գալուզինը։
Նրա խոսքով, այլ երկրներն իրավունք չունեն Բաքվի ու Երեւանի փոխարեն որոշել այս հարցում։
Միաժամանակ Գալուզինը հիշեցրել է, որ Ռուսաստանը չի կարող անտարբեր լինել այն ամենի նկատմամբ, ինչ կատարվում է Հարավային Կովկասում, տարածաշրջանը պատմականորեն կապված է ռուսական պետության հետ։
«Ռուսաստանի Դաշնությունը Հարավային Կովկասում և աշխարհում միակ երկիրն է, որը դաշինքային հարաբերություններ է պահպանում ինչպես Ադրբեջանի, այնպես էլ Հայաստանի հետ»,- նշել է դիվանագետը։
Իր հայտարարության մեջ Գալուզինը նաև ընդգծել է, որ Հարավային Կովկասի տարածաշրջանի ճակատագիրը պետք է որոշեն նրա մշտական բնակիչները։ Նրա խոսքով՝ իրենցից բացի ոչ ոք չի կարող ճանապարհ հարթել կայուն խաղաղության և կայունության համար։
