Ադրբեջանում Եվրամիության (ԵՄ) պատվիրակության ղեկավար Պյոտր Միխալկոն ասել է, որ «սարսափած է» երկրում լրագրողների նկատմամբ վերաբերմունքից։
Toplum TV-ն հայտնում է, որ Միխալկոն այս մասին գրել է հունվարի 16-ին «X» սոցցանցում։
«Ինձ սարսափեցնում են Ադրբեջանում վերջերս ձերբակալված որոշ լրագրողների, հատկապես երիտասարդ կանանց նվաստացուցիչ վերաբերմունքի մասին հաղորդումները, որոնց ձեռնաշղթաներ են հագցրել, դրել ապակե վանդակների մեջ կամ զրկել դատարանների դահլիճում մարդու տարրական կարիքներից: Յուրաքանչյուր ոք ունի արժանապատվությամբ և հարգանքով վերաբերվելու իրավունք»,- ընդգծել է Միխալկոն իր հայտարարության մեջ։
Եվրամիության հետ մեկտեղ ԱՄՆ Պետդեպարտամենտը ևս մեկ անգամ խորը մտահոգություն է հայտնել Ադրբեջանում լրագրողների, քաղաքացիական ակտիվիստների և ընդդիմադիր գործիչների վերջին ձերբակալությունների կապակցությամբ։
Պետքարտուղարությունը հունվարի 16-ին կոչ է արել Ադրբեջանի կառավարությանը և կոչ արել հարգել մարդու իրավունքները, հիմնարար ազատությունները, ներառյալ խոսքի ազատությունը։
Նշենք, որ երեկ ԵԱՀԿ-ն նույնպես մեկնաբանել է Ադրբեջանում լրագրողների ձերբակալությունը։ Կազմակերպության ԶԼՄ-ների ազատության ներկայացուցիչ Թերեզա Ռիբեյրոն իր հայտարարության մեջ նշել է, որ Ադրբեջանում մամուլի աշխատակիցների վերջին ձերբակալությունները, ինչպես նաև նրանց հարազատների նկատմամբ ոտնձգությունները խորը մտահոգություն են առաջացրել։
