Ադրբեջանում Մեծ Բրիտանիայի դեսպան Ֆերգուս Օլդը հանդիպել է որոշ ժամանակ առաջ ձերբակալված «Մուսավաթ» կուսակցության անդամ Թոֆիգ Յագուբլուի դստեր՝ Նիգար Յագուբլուի հետ։.
Toplum TV-ն հայտնում է, որ դեսպանն այս մասին տեղեկություն է հրապարակել հունվարի 17-ին իր X աքաունթում.
«Հասարակական ակտիվիստ Նիգար Յագուբլուի հետ հանդիպմանը մենք քննարկել ենք նրա հոր՝ ընդդիմադիր քաղաքական գործիչ Թոֆիգ Յագուբլուի ձերբակալությունը և նրա ընտանիքի մտահոգությունները։
Պաշտոնատար անձանց կոչ եմ անում անկախ հետաքննություն անցկացնել և արագ ավարտին հասցնել քննչական գործընթացները»։
Թոֆիգ Յագուբլուն ձերբակալվել էր անցյալ տարվա դեկտեմբերի 14-ին։
Նրա դեմ քրեական գործ է հարուցվել Քրեական օրենսգրքի խարդախության, կեղծման և պաշտոնական փաստաթղթեր օգտագործելու հոդվածներով։
Քաղաքական գործիչը չի ընդունում առաջադրված մեղադրանքը և հայտարարում է, որ իր ձերբակալությունը քաղաքական պատվեր է։