Ադրբեջանի արտգործնախարար Ջեյհուն Բայրամովը խորհրդանշական արարողությամբ Չմիավորման շարժման նախագահությունը փոխանցել է Ուգանդայի նախագահ Յովերի Կագութ Մուսևենիին։ Միջոցառումը տեղի է ունեցել հունվարի 15-ից 20-ը Ուգանդայի մայրաքաղաք Կամպալայում անցկացվելիք Չմիավորման շարժման 19-րդ գագաթնաժողովի առաջին օրը։
Սոցցանցերում տարածվել է Ադրբեջանից Ուգանդա ղեկավարության անցումը նշանավորող մուրճի խորհրդանշական տեղափոխման տեսանյութը։ Ադրբեջանը Չմիավորման շարժումը նախագահել է չորս տարի՝ 2020-2023 թվականներին։
Ուգանդան մտադիր է ղեկավարել կազմակերպության աշխատանքը առաջիկա երեք տարիներին՝ ստանձնելով անդամ երկրների միջև համագործակցության և երկխոսության խթանման պատասխանատվությունը։ Չմիավորման շարժումը, որը միավորում է 120 անդամ պետություն, ձգտում է պաշտպանել իր անդամների ինքնիշխանությունն ու անկախությունը՝ միաժամանակ խթանելով փոխըմբռնումն ու համերաշխությունը գլոբալ խնդիրների շուրջ: Ուգանդայի նախագահությունը երկրին հնարավորություն է տալիս իր ներդրումն ունենալ կազմակերպության օրակարգում և պաշտպանել ոչ դաշնակցային երկրների շահերը։
