Ադրբեջանը կվերսկսի Իրանում իր դեսպանատան գործունեությունը, եթե դիվանագիտական ներկայացուցչության դեմ իրականացված ահաբեկչության հետաքննությունն ավարտվի, և նրա գործունեության անվտանգությունը երաշխավորվի։ Այս մասին այսօր լրագրողներին ասել է Ադրբեջանի արտգործնախարար Ջեյհուն Բայրամովը։
Դիվանագիտական ներկայացուցչության վրա զինված հարձակման հետեւանքով Թեհրանում Ադրբեջանի դեսպանատան անվտանգության ծառայության աշխատակից Օրխան Ասկերովի մահվան տարելիցի կապակցությամբ նախարարն այսօր այցելել է նրա գերեզման։
Բայրամովը նշել է, որ դեսպանատան աշխատանքը վերականգնելու համար պետք է կատարվի երկու պայման.
«Առաջին կետը ահաբեկչության հետ կապված հետաքննության ավարտն ու դատավճիռն է։ Երկրորդ՝ մեր դեսպանատան անվտանգությունը պետք է լիովին երաշխավորված լինի եւ մենք պետք է վստահ լինենք դրանում»,- շեշտեց նախարարը։
2023 թվականի հունվարի 27-ին զինված հարձակում է իրականացվել Իրանում Ադրբեջանի դեսպանատան վրա։ Միջադեպի ընթացքում զոհվել է անվտանգության ծառայության մեկ աշխատակից, եւս երկուսը վիրավորվել են։
Վիրավորներից մեկին հաջողվել է հարձակվողին դուրս հանել դեսպանատան շենքից։ Նա շենքից դուրս որոշ ժամանակ շարունակել է սպառնալ դիվանագիտական ներկայացուցչությանը։ Մինչ այս ամենը տեղի էր ունենում, Իրանի ուժային կառույցները լիովին անգործուն էին։ Իրանի իշխանությունները հանցագործության պատճառները փորձել են որակել որպես «անձնական դրդապատճառներ», իսկ Ադրբեջանում տեղի ունեցած հարձակումը գնահատվել է որպես ահաբեկչություն։
Դիվանագետների, մյուս աշխատակիցների և նրանց ընտանիքի անդամների կյանքի անվտանգության բացակայության պատճառով Ադրբեջանը տարհանել է նրանց և դադարեցրել դեսպանատան գործունեությունը։
Որոշ ժամանակ առաջ Ադրբեջանի արտաքին գործերի նախարարությունը տեղեկություն էր տարածել Իրանում այսօր դեսպանատան վրա հարձակման հարցով դատարանի առաջին նիստի մեկնարկի մասին։
