Ադրբեջանում ԱՄՆ-ի և Մեծ Բրիտանիայի դեսպանները Բաքվում Հուսեյն Ջավիդի հուշարձանի մոտ հարգել են օրեր առաջ Ռուսաստանում բանտում մահացած Ալեքսեյ Նավալնիի հիշատակը։
Toplum TV-ն հայտնում է, որ Մեծ Բրիտանիայի դեսպան Ֆերգուս Օլդն այս մասին հայտնել է սոցցանցերի իր միկրոբլոգում։
«Այսօր ԱՄՆ դեսպան Մարկ Լիբիի հետ միասին ես ծաղիկներ դրեցի Հուսեյն Ջավիդի հուշարձանի առջև՝ հարգելու Ալեքսեյ Նավալնիի հիշատակը, ով անհավանական քաջություն դրսևորեց՝ պաշտպանելու ռուսական ժողովրդավարության ավելի լավ ապագան իր ողջ կյանքի ընթացքում», – ասվում է Օլդի հայտարարության մեջ։
Նշենք, որ փետրվարի 16-ին ՌԴ Դաշնային քրեակատարողական ծառայությունը հայտնել էր, որ Ալեքսեյ Նավալնին մահացել է Յամալո-Նենեց շրջանի Խարպ գյուղի գաղութում։
47-ամյա քաղաքական գործչի մահից հետո ամբողջ Ռուսաստանում մարդիկ դուրս են եկել փողոց՝ հարգելու նրա հիշատակը։ Հաղորդվում է, որ ավելի քան 400 մարդ բերման է ենթարկվել ոստիկանություն:
Ալեքսեյ Նավալնին, որը համարվում է նախագահ Վլադիմիր Պուտինի ամենաջերմ հակառակորդը, բանտում է 2021 թվականից։
