Ռուսաստանում ձերբակալվել է ֆիթնեսի մարզիչ և ազդեցիկ Քամիլ Զեյնալին։
Toplum TV-ն հայտնում է, որ այս մասին տեղեկություն է հրապարակել «Instagram»-ի իր աքաունթում։
«Ես գալիս էի Ադրբեջան։ Ռուսաստանի Դոմոդեդովո օդանավակայանում ոստիկանները կանգնեցրին ինձ և բերման ենթարկեցին բաժին։ Ասացին, որ Հայաստանն ինձ միջազգային հետախուզման է ենթարկել։ Ասել են՝ կամ ձեզ կհանձնենք Հայաստանին, կամ կգան այստեղից կտանեն։ Առավոտյան ինձ կբերեն դատարան»,- ասաց նա։
Կ.Զեյնալլին նշել է նաև, որ ինքը հետախուզման մեջ է եղել անցյալ տարվա մայիսից. «Սակայն մայիսից արդեն 3-րդ անգամ եմ գնում-գալիս Ռուսաստան, հիմա էլ ձերբակալել են։ Հուսով եմ, որ մեր պետական կառույցները կաջակցեն ինձ։ Չեն թողնի, որ իրենց հանձնեն։ Այս պահին ոստիկանական բաժանմունքում եմ։ Սպասում եմ, հուսով եմ լավ կլինի»։
Ադրբեջանի արտաքին գործերի նախարարությունն արդեն իսկ հայտարարություն է տարածել խնդրի առնչությամբ։
Հաղորդվել է, որ գործը գտնվում է Ռուսաստանում Ադրբեջանի դեսպանատան հսկողության ներքո, և Կ.Զեյնալլիին ցուցաբերվում է համապատասխան հյուպատոսական և իրավական օգնություն։
Նշենք, որ 44-օրյա պատերազմի ընթացքում եւ դրանից հետո Քամիլ Զեյնալլին սուր քննադատություններ է հնչեցրել Հայաստանի հասցեին։ Մի քանի բողոքների արդյունքում սահմանափակվել են նաև նրա հաշիվները սոցիալական ցանցերում։
