Եվրոպայի խորհրդի խորհրդարանական վեհաժողովում վրացական պատվիրակության ղեկավար Գիվի Միկանաձեն կազմակերպությանը կոչ է արել վերանայել Ադրբեջանի դեմ բանաձեւը։
Toplum TV-ն հայտնում է, որ Միկանաձեն այս մասին հայտարարել է փետրվարի 20-ին ԵԽԽՎ նախագահ Թեոդորոս Ռուսոպուլոսին ուղղված նամակում։
Միկանաձեն իր նամակում նշել է, որ Ադրբեջանին իր լիազորություններից զրկելը անհնարին է դարձնում Վեհաժողովի շրջանակներում Ադրբեջանի հետ համագործակցությունն ու մտքերի փոխանակումը։ Նրա խոսքով, նման կոշտ որոշումներն ընդունվում են առանց հաշվի առնելու հնարավոր բացասական հետեւանքները ԵԽԽՎ-ի հետագա հարաբերությունների համար Ադրբեջանի եւ ընդհանրապես Հարավային Կովկասի հետ։ Ավելին, դա նաև խաթարում է Եվրոպայի խորհրդի՝ որպես երկխոսության և համագործակցության կարևոր հարթակի հեղինակությունը։
Նամակի վերջում Միկանաձեն վստահություն է հայտնել, որ այս բանաձեւի չեղարկումը կծառայի Եվրոպական խորհրդի շահերին։
Նշենք, որ անցյալ ամիս ԵԽԽՎ-ն չվավերացրեց կազմակերպությունում Ադրբեջանի պատվիրակության լիազորությունները՝ պատճառաբանելով, որ այն «խախտել է իր պարտավորությունները և վնասել արժեքներին»։ Դրանից հետո՝ հունվարի 24-ին, Ադրբեջանի պատվիրակությունը հայտարարեց ԵԽԽՎ-ի հետ համագործակցության դադարեցման մասին։ Ադրբեջանական կողմը ԵԽԽՎ-ին մեղադրել է ռասիզմի և անհանդուրժողականության մեջ.
Իր հերթին նախագահ Իլհամ Ալիևն ասել է, որ Ադրբեջանը կարող է վերանայել Եվրոպայի խորհրդին և Մարդու իրավունքների եվրոպական դատարանին մասնակցելու հարցը։
