Գերմանա-ադրբեջանական արտաքին առևտրի պալատը կազմակերպել է գերմանական վեց ընկերությունների այց և հանդիպումներ Ադրբեջանի պետական կառույցների հետ։ Գերմանացիները ցանկանում են մասնակցել Ղարաբաղի տնտեսական տարածաշրջանում ջրատարների և կոյուղու ցանցերի կառուցմանը։
Բաքվում այս խնդրին նվիրված համաժողովում գերմանական ընկերությունների ներկայացուցիչները ցուցադրել են իրենց հնարավորություններն ու այլ երկրներում կատարած աշխատանքը։
Պալատի գործադիր անդամ Թոբիաս Բաումանը նշել է, որ լրատվամիջոցները բազմաթիվ տեղեկություններ են հրապարակել Բաքվի և Բեռլինի միջև որոշակի «քաղաքական տարաձայնությունների» մասին։ Փաստորեն, Ադրբեջանն ու Գերմանիան «պահպանում են սերտ տնտեսական համագործակցությունը»։
Նրա խոսքով, ի սկզբանե նախատեսված էր ընկերության ներկայացուցիչների այցը Ղարաբաղ, սակայն այցը չի կայացել «չբացահայտված պատճառներով»։ Բաումանն ասել է, որ վստահ է, որ նման այց ավելի ուշ կլինի։
Ադրբեջանում Գերմանիայի դիվանագիտական ներկայացուցչության ղեկավարի տեղակալ Հայկո Շվարցը հայտնել է, որ իր երկրի արտաքին գործերի նախարարությունը մեծ ուշադրություն է դարձնում այլ երկրների բնակչությանը մաքուր ջրով ապահովելու խնդրին։ Նա կարծում է, որ Գերմանիան կարող է օգտակար լինել Ադրբեջանին, գերմանական ընկերություններն ու տեխնոլոգիաները կօգնեն ազատագրված տարածքներում կառավարվող կոյուղու և մաքուր ջրի համակարգ կառուցել։
Համաժողովին ելույթ ունեցան գերմանական Lutz-Jesco GmbH, Megger Germany GmbH, Herrenknect, Siemens AG Osterreich, Bioworks Verfahrenstechnik GmbH, GuPont Water Solutions ընկերությունների ներկայացուցիչները։
Ազատագրված տարածքներում Ադրբեջանի նախագահի հատուկ ներկայացուցչի տեղակալ Բաշիր Հաջիևը նշել է, որ գերմանական ընկերությունների ժամանումը կարևոր է, քանի որ Ադրբեջանը մտադիր է վերականգնողական աշխատանքներ կատարել բարձր տեխնիկական մակարդակով՝ կանաչ տեխնոլոգիաների կիրառմամբ։
Գերմանիայի շրջակա միջավայրի և միջուկային անվտանգության դաշնային նախարարությունը մասնակցել է գերմանական ընկերությունների ներկայացուցիչների այցի կազմակերպմանը և համաժողովի անցկացմանը։
