Ոչ ոք չի կարող քննադատել հայկական բանակին իր պաշտպանունակությունն ամրապնդելու համար. Այս մասին ուրբաթ օրը Հայաստանի պաշտպանության նախարարի հետ Երեւանում կայացած մամուլի ասուլիսում ասաց Ֆրանսիայի զինված ուժերի նախարար Սեբաստիան Լեկորնը։
«Չեմ մանրամասնի, թե ինչ տեխնիկա է տրվելու Հայաստանին, բայց բոլորն էլ պաշտպանական նշանակություն ունեն։
ՀՕՊ համակարգերի մասին էլ պետք է ասեմ, որ եթե դրանք Հայաստանին անհրաժեշտ լինեն, ձեր տրամադրության տակ կունենաք կարճ, միջին և այլ հեռահարության հրթիռներ»,- ասաց ֆրանսիացի նախարարը։
«Ամեն անգամ մենք կարձագանքենք մեր հայ գործընկերների գործառնական կարիքներին»,- ասել է Լեկորնը։
Իր հերթին Հայաստանի պաշտպանության նախարար Սուրեն Պապիկյանը նշել է, որ Հայաստանը զենք կգնի նույնիսկ Ադրբեջանի հետ խաղաղության պայմանագրի կնքումից հետո։
Նրա խոսքով՝ գնված զենքերն ուղղված չեն եղել որեւէ երկրի դեմ։
Ըստ հայկական ԶԼՄ-ների՝ կողմերը բանակցում են MISTRAL 3 զենիթահրթիռային համալիրների մատակարարման շուրջ։ Բացի այդ, Ֆրանսիայի Սենատում քննարկվել է «Կեսար» ինքնագնաց հրետանային ստորաբաժանումների մատակարարման հնարավորությունը։
«Ֆիգարո» թերթը գրել է, որ Հայաստան են ուղարկվել Ground Master ռադարներ (GM200) և գիշերային տեսողության սարքեր։ Thales Corporation-ի արտադրած ռադարները թույլ են տալիս ճանաչել օդային օբյեկտները 250 կիլոմետր շառավղով, մինչդեռ գիշերային օպտիկան արտադրում է Safran Corporation-ը: Անցյալ տարի Ֆրանսիան Հայաստանին տվել է «Բաստիոն» տեսակի 24 զրահամեքենա, իսկ 26-ը արտադրության փուլում է։
