Նախագահ Իլհամ Ալիևը հաստատել է Ադրբեջանի հավատարմությունը միջազգային էներգետիկ գործընկերության շրջանակներում ստանձնած պարտավորություններին և պատրաստակամությունը զարգացնելու ածխաջրածին և կանաչ էներգիայի մատակարարման նախագծերը Եվրոպային։
«Ադրբեջանը հաստատել է իրեն որպես վստահելի գործընկեր։ Մեր խոսքը նույնքան կարևոր է, որքան մեր ստորագրությունը»,- ասել է Ալիևը մարտի 1-ին Բաքվում Հարավային գազային միջանցքի խորհրդատվական խորհրդի շրջանակներում 10-րդ նախարարների հանդիպմանը և 2-րդ նախարարների հանդիպմանը՝ Կանաչ էներգիայի խորհրդատվական խորհրդի շրջանակներում։
«Վստահ եմ, որ այն բոլոր ծրագրերը, որոնք մենք սահմանել ենք, կիրականացվեն»,- հավելեց նա։
Նրա խոսքով, Ադրբեջանի կողմից իրականացվող Հարավային գազային միջանցքը Եվրասիայի խոշորագույն ենթակառուցվածքային նախագծերից էր։
Ադրբեջանը աջակցում է մատակարարման ուղիների և էներգիայի աղբյուրների դիվերսիֆիկացմանը։ «Այսօր Եվրասիայում ստեղծված աշխարհաքաղաքական իրավիճակը հստակորեն ապացուցում է, թե ինչ է պետք անել»,- ասել է նա։
Ալիևը նաև նշել է, որ Ազերի-Չիրագ-Գյունաշլի (ACG) հանքավայրի բլոկի խորը շերտերից (խորը գազ) բնական գազի արդյունահանումը կսկսվի 2025 թվականի առաջին եռամսյակում։
ACG բլոկը, որը երկար տարիներ եղել է ադրբեջանական նավթի հիմնական արտահանման աղբյուրը, նույնպես լրացուցիչ աղբյուր է լինելու ադրբեջանական գազի մատակարարման համար։
Ինչպես հաղորդվում է, ACG-ում գազի խորքային պաշարները գնահատվում են 300 միլիարդ խորանարդ մետր գազ:
Նշենք, որ Հարավային գազային միջանցքի խորհրդատվական խորհրդի և Կանաչ էներգետիկայի խորհրդատվական խորհրդի նիստին մասնակցում են 33 երկրների պատվիրակություններ, այդ թվում՝ էներգետիկ հարցերով եվրահանձնակատար Քադրի Սիմսոնը։
