1991 թվականից ի վեր Հայաստանի շարունակական կախվածությունը Ռուսաստանից հանրապետության «ռազմավարական սխալն էր», Հանրային հեռուստաընկերությանը տված հարցազրույցում ասել է Անվտանգության խորհրդի քարտուղար Արմեն Գրիգորյանը։
Նրա խոսքով՝ 20 տարի Երեւանը Մոսկվայից կախվածության մեջ է եղել գրեթե բոլոր ուղղություններով՝ քաղաքական, տնտեսական, գիտական, ռազմական։
Սակայն 2020 թվականին «տեսանք, որ այս համակարգը չի գործում»։ Հայաստանի իշխանությունները սկսել են քայլեր ձեռնարկել երկրի անվտանգությունն ապահովելու համար այլընտրանքներ գտնելու ուղղությամբ, ասաց Գրիգորյանը։
Նա ասաց նաեւ, որ վերջին տարիներին Հայաստանի ռազմատեխնիկական համագործակցության մեջ Ռուսաստանի մասնաբաժինը 96 տոկոսից նվազել է 10 տոկոսի, եւ դա «Ռուսաստանի ընտրությունն էր»։ Նրա խոսքով, 2021 թվականից Երևանը Մոսկվայի հետ 250 միլիոն դոլարի զենքի մատակարարման պայմանագիր է կնքել, ինչպես նաև մշակել է բանակում բարեփոխումների հայեցակարգը։ Սակայն զենք չի ուղարկվել, ինչը ստիպել է երկրին նոր գործընկերներ փնտրել, ընդգծել է ԱԽ քարտուղարը։ «Նման գործընկերներից է Հնդկաստանը, վերջերս դարձել է նաեւ Ֆրանսիան։ Սկսեցինք աշխատել Եվրամիության տարբեր երկրների և շատ այլ երկրների հետ»,- հավելեց նա։
