Մարտի 5-ին Ադրբեջանի ԱԳ նախարար Ջեյհուն Բայրամովը հանդիպել է Իրանի արտգործնախարար Հուսեյն Ամիր-Աբդուլլայանի հետ՝ Իսլամական համագործակցության կազմակերպության (ԻՀԿ) արտաքին գործերի նախարարների խորհրդի արտահերթ նիստին մասնակցելու շրջանակներում։
Ադրբեջանի արտաքին գործերի նախարարության տեղեկատվության համաձայն՝ հանդիպման ընթացքում երկու երկրների միջև քննարկվել են երկկողմ և տարածաշրջանային հարցեր, ինչպես նաև տարածաշրջանում տիրող իրավիճակը։
Նախարարները մտքեր են փոխանակել նաև Ադրբեջանի դեսպանատան վրա ահաբեկչություն իրականացրած անձի նկատմամբ դատարանի վճռից հետո մեր դեսպանատան աշխատանքը վերականգնելու քայլերի շուրջ։
«Կողմերը քննարկել են բարձր մակարդակի շփումների ընդլայնման ծրագրերը, Ադրբեջանի և Իրանի միջև տնտեսական համագործակցության միջկառավարական համատեղ հանձնաժողովի աշխատանքի կարևորությունը, տարածաշրջանում տրանսպորտային և կապի միջանցքների զարգացումն ու ընդլայնումը։ Բայրամովը նշել է, որ Կլիմայի փոփոխության մասին ՄԱԿ-ի շրջանակային կոնվենցիայի (COP-29) Կողմերի համաժողովի 29-րդ նստաշրջանը, որն այս տարի կանցկացվի մեր երկրում, համագործակցության լրացուցիչ հնարավորություններ է ստեղծում»,- նշվում է տեղեկատվության մեջ։
Նախարար Բայրամովը մյուս կողմին տեղեկացրել է տարածաշրջանային իրավիճակի, ինչպես նաև Ադրբեջանի և Հայաստանի միջև խաղաղ գործընթացի ներկա իրավիճակի և հեռանկարների մասին։
«Հանդիպման ընթացքում ընդգծվել է, որ Հայաստանի ներգրավվածությունը երրորդ կողմերի, որոնք չեն ծառայում տարածաշրջանում խաղաղությանը և կայունությանը, ինչպես նաև որոշ պետությունների կողմից Հայաստանին զինելու ջանքերը սպառնալիք են խաղաղ գործընթացի համար»,- ասել են Ադրբեջանի ԱԳՆ-ում։