Մարտի 5-ին Բաքվում Ադրբեջանի և Ռուսաստանի միջև մի շարք փաստաթղթեր են ստորագրվել զբոսաշրջության և մշակույթի, ինչպես նաև ադրբեջանա-ռուսական պետական սահմանային անցակետերի և ճանապարհային ենթակառուցվածքների զարգացման վերաբերյալ երկկողմ համագործակցության ամրապնդման վերաբերյալ։
Toplum TV-ն հայտնում է, որ այս մասին տեղեկություն է տարածել Ադրբեջանի Նախարարների կաբինետի մամուլի ծառայությունը։
Հաղորդվում է, որ ՌԴ վարչապետ Միխայիլ Միշուստինի Բաքու երկօրյա այցի շրջանակներում հանդիպում է կայացել Ադրբեջանի վարչապետ Ալի Ասադովի հետ։
Հանդիպման ընթացքում կողմերն ասել են, որ Ադրբեջան-Ռուսաստան ռազմավարական գործընկերությունը տարբեր ոլորտներում գտնվում է բարձր մակարդակի վրա։ Նրանք նաև գոհունակություն են հայտնել 2023 թվականին ձեռք բերված 4,3 միլիարդ ԱՄՆ դոլարի փոխադարձ առևտրի ռեկորդային մակարդակի կապակցությամբ։
«Տրանսպորտի եւ տարանցման ոլորտը գնահատվել է որպես Ադրբեջան-Ռուսաստան համագործակցության հիմնական ուղղություն։ 2023 թվականի արդյունքներով Ադրբեջանի և Ռուսաստանի միջև բեռնափոխադրումների ծավալն աճել է ավելի քան 11 տոկոսով։ Կողմերը նշել են «Հյուսիս-Հարավ» միջազգային տրանսպորտային միջանցքի կարևորությունը և ողջունել համատեղ ջանքերը՝ այս միջանցքն իր ողջ հզորությամբ բերելու ուղղությամբ: Այս առումով նշվել է ճանապարհային և երկաթուղային ենթակառուցվածքների բարելավման և պետական սահմանով անցման կետերի զարգացման ուղղությամբ միաժամանակյա աշխատանքի կարևորությունը։ Գոհունակություն է արտահայտվել մշակութային-հումանիտար համագործակցության ավանդական բարձր մակարդակի կապակցությամբ։ Հետագայում կողմերը հայտարարել են մշակույթի, գիտության և երիտասարդության միջև փոխանակման, ինչպես նաև կրթության ոլորտում փոխադարձ գործունեության զարգացման անհրաժեշտության մասին»,- ասված է պաշտոնական տեղեկատվության մեջ։
ՏԱՍՍ-ը հայտնում է, որ հանդիպման ժամանակ Ալի Ասադովն ասել է, որ Ադրբեջանը մտադիր է էլ ավելի ամրապնդել հարաբերությունները Ռուսաստանի հետ։ Նրա խոսքով, դա Բաքվի համար կարեւոր առաջնահերթություններից է։
