Երեքշաբթի օրը Բայդենի վարչակազմը հայտարարեց, որ 300 միլիոն դոլար արժողությամբ զենքի նոր փաթեթ կուղարկի Ուկրաինային։ Որոշ ժամանակ առաջ Կոնգրեսում հանրապետականները կոչ էին անում վարկեր տրամադրել Ուկրաինային, այլ ոչ թե փող։ Պետքարտուղարությունը մերժել է այս առաջարկը։ «Մենք չենք ցանկանում ծանրաբեռնել Ուկրաինան միլիարդավոր դոլարների արտաքին պարտքով այն ժամանակ, երբ նա փորձում է գոյատևել և ոտքի կանգնել»,- Turan-ի հարցերին ի պատասխան ասել է մամուլի քարտուղար Մեթյու Միլլերը։
Սպիտակ տունը հայտնել է, որ Պենտագոնը հնարավորություն ունի Ուկրաինային տրամադրել Stinger զենիթահրթիռներ, զինամթերք HIMARS-ի համար, հրետանային արկեր, հակատանկային զենքեր, պայթուցիկ սարքեր և փոքր զենքի զինամթերք, ինչպես նաև պահեստամասեր և այլ սարքավորումներ:
«Մենք Կոչ ենք անում Ներկայացուցիչների պալատին հնարավորինս շուտ ընդունել Ուկրաինային կենսական օգնություն ցուցաբերելու վարչակազմի առաջարկը»,- ասել է Էնթոնի Բլինկենը։
Հոկտեմբերից Բայդենի վարչակազմը ճնշում է գործադրել Կոնգրեսի վրա՝ ընդունելու 105 միլիարդ դոլարի ծախսերի օրինագիծը, որը ներառում է Ուկրաինային ռազմական օգնության մեծ մասը: Սակայն Ներկայացուցիչների պալատի հանրապետական ղեկավարությունը հրաժարվել է քվեարկել այս օրինագծի օգտին։
Երեքշաբթի օրը Բայդենի վարչակազմը նաև հայտարարեց, որ մտադիր է լրացուցիչ 126 միլիոն դոլար հատկացնել Ուկրաինային՝ արտաքին աջակցության մասին օրենքի համաձայն։
