Մարտի 15-ին Ժնևում ՄԱԿ-ի Մարդու իրավունքների խորհրդի 55-րդ նստաշրջանի շրջանակներում տեղի կունենա «COP29-ի նախօրեին Ադրբեջանի ԶԼՄ-ների և քաղաքացիական հասարակության ճնշման տակ» թեմայով զուգահեռ միջոցառում:
Միջոցառումը կազմակերպել է Նորվեգական Human Rights House հիմնադրամը։
Միջոցառմանը ելույթ կունենան քաղաքական վտարանդի ադրբեջանցի լրագրողներ՝ Արզու Գեյբուլան, Լեյլա Մուստաֆաևան և Նորվեգիայի Human Rights House հիմնադրամի ներկայացուցիչ Քեթի Աբաշիձեն։
Հիմնադրամի տեղեկությունների համաձայն՝ երկրում անկախ ԶԼՄ-ների և քաղաքացիական հասարակության նկատմամբ ճնշումն ուժեղացել է այն բանից հետո, երբ անցյալ տարվա նոյեմբերին ՄԱԿ-ի Մարդու իրավունքների խորհուրդը վերանայեց Ադրբեջանի վերաբերյալ զեկույցը։ Մասնավորապես, ձերբակալվել են լրագրողներ և ակտիվիստներ։
«Վերջին ռեպրեսիաները տեղի են ունեցել Ադրբեջանում 235 քաղբանտարկյալների ֆոնին։ Այս բանտարկյալներից մեկը՝ գիտնական և քաղաքական գործիչ Գուբադ Իբադօղլուն, զրկված է կենսական նշանակության բժշկական օգնությունից, և նրա առողջական վիճակը շարունակում է լրջորեն վատթարանալ»,- հայտնել են հիմնադրամից։
Այս ամենը տեղի է ունեցել փետրվարի 7-ի նախագահական ընտրությունների նախօրեին, մինչդեռ Ադրբեջանը պատրաստվում է 2024 թվականի նոյեմբերին ընդունել ՄԱԿ-ի Կլիմայի փոփոխության համաժողովը։
Այս ամենը լուրջ հարցեր է առաջացնում Ադրբեջանում մարդու իրավունքների և խոսքի ազատության ոլորտում տիրող իրավիճակի վերաբերյալ, նշում է Human Rights House հիմնադրամը։
