Իրանի պետական լրատվամիջոցները հաղորդում են, որ զոհվածների թվում է Իրանի հեղափոխության պահապանների կորպուսի բարձրաստիճան հրամանատար Մոհամմադ Ռեզա Զահեդին։
Իրանական լրատվական գործակալություններից մեկը հայտնել է, որ զոհվել է հինգ մարդ, իսկ Մեծ Բրիտանիայում տեղակայված Մարդու իրավունքների սիրիական դիտորդական կենտրոնը հայտնել է ութ մարդու մահվան մասին:
Իրանի դեսպանատունն ու հյուպատոսությունը գտնվում են Դամասկոսի կենտրոնում։
Իրանի արտգործնախարարության խոսնակն ասել է, որ Թեհրանն իրեն իրավունք է վերապահում միջոցներ ձեռնարկել Դամասկոսի վրա այսօր հարձակման հետեւում կանգնած «ագրեսորների» դեմ։
Reuters-ի փոխանցմամբ՝ Նասեր Քանաանին ասել է, որ «Թեհրանը կորոշի ագրեսորի դեմ պատասխանի և պատժի տեսակը»։
Ե՛վ Իրանը, և՛ Սիրիան մեղադրում են Իսրայելին Դամասկոսի կենտրոնում հարձակումն իրականացնելու մեջ։ Իսրայելը չի արձագանքել մեղադրանքներին և ասել է, որ չի մեկնաբանում օտարերկրյա լրատվամիջոցների հաղորդագրությունները։
Իսրայելը հարյուրավոր հարվածներ է հասցրել Սիրիայում Իրանի հետ կապված օբյեկտներին վերջին մի քանի տարիների ընթացքում, սակայն հազվադեպ է ընդունում այդ հարվածները:
Լուրը թարմացվում է։
