Ապրիլի 15-ի երեկոյան Թբիլիսիում ձերբակալվել է բողոքի ակցիայի 14 մասնակից, հայտնել են Վրաստանի արտաքին գործերի նախարարությունից։
Խորհրդարանի շենքի դիմաց բողոքի ակցիան սկսվել է առավոտյան, երբ խորհրդարանի իրավական հանձնաժողովը քննարկում էր «օտարերկրյա գործակալների մասին» օրենքի նախագիծը։ Ժամը 22:00-ի սահմաններում հանձնաժողովն ընդունեց նախագիծը։
Տասնյակ հազարավոր ցուցարարներ պահանջում էին չընդունել «ռուսական» օրենքը և հրաժարվեցին ցրվել։ Ակցիայի նախաձեռնողը հասարակական կազմակերպությունների և քաղաքացիական հասարակության ներկայացուցիչներ էին։ Նրանք կրկին կհանդիպեն այսօր, երբ սկսվի խորհրդարանի լիագումար նիստը։
Անցյալ տարվա մարտին այս օրենքի նախագիծը հետ կանչվեց զանգվածային բողոքի ակցիաների ֆոնին։ Այն ժամանակ իշխանությունները հայտնել էին, որ «օտարերկրյա դոնորները մեծացնում են Վրաստանի արմատական խմբերին ու կուսակցություններին հատկացվող գաղտնի ֆինանսավորումը»։
Առաջատար ընդդիմադիր կուսակցությունները և ազդեցիկ ՀԿ-ները պնդում են, որ «օտարերկրյա գործակալների» օրենքը հավասարեցնում է Վրաստանի բարեկամներին և թշնամիներին, պիտակավորում է հասարակական կազմակերպություններին և խոչընդոտում է երկրի ԵՄ ինտեգրմանը:
Եվրամիությունը, ներառյալ ԵՄ առանձին երկրները, Միացյալ Նահանգները, ՄԱԿ-ը, ՆԱՏՕ-ն և Եվրոպայի խորհուրդը կոչ են արել Վրաստանի իշխանություններին հրաժարվել այս օրենքի նախագծից։
Երկրի նախագահ Սալոմե Զուրաբիշվիլին հայտարարել է, որ օրենքի ընդունման դեպքում վետո կդնի։
Այս տեսահոլովակը դիտելու համար խնդրում ենք միացնել JavaScript-ը և արդիականացնել a
վեբ զննարկիչը, որ
աջակցում է HTML5 տեսանյութը
