Ռուս լրագրող Վլադիմիր Կարա-Մուրզայի նկատմամբ հետապնդումներին ու դաժան վերաբերմունքին անմիջականորեն պատասխանատու և մասնակից բոլոր անձինք պետք է ներառվեն «Մագնիտսկու օրենքներին» համապատասխան պատրաստված պատժամիջոցների ցուցակներում։ Այս մասին ասված է ապրիլի 17-ին ԵԽԽՎ լիագումար նիստում ընդունված բանաձեւում։
ԱՄՆ-ի, Կանադայի, Մեծ Բրիտանիայի և ԵՄ այլ երկրների կողմից ընդունված «Մագնիտսկու օրենքները» թույլ են տալիս պատժամիջոցներ կիրառել մարդու իրավունքների խախտման համար մեղավոր անձանց նկատմամբ։
Ընդունված բանաձեւում նշվում է նաեւ, որ Կարա-Մուրզայի կողմնակիցները դաժան պատիժը (25 տարի ազատազրկում) համարում են «վրեժ՝ երկար տարիներ Մագնիտսկու օրենքներին նրա ակտիվ աջակցության համար»։
ԵԽԽՎ-ն կոչ է արել ԵՄ-ին և թիրախային պատժամիջոցների մասին օրենքներ ունեցող մյուս երկրներին «պատժամիջոցային ցուցակներում ներառել Կարա-Մուրզայի նկատմամբ հետապնդումների և դաժան վերաբերմունքի համար պատասխանատուներին»:
Վեհաժողովը նաեւ առաջարկել է, որ բոլոր պետությունները, որոնք դեռ չեն ընդունել «Մագնիտսկու օրենքները», դա անեն անմիջապես։
ԵԽԽՎ-ն կոչ է արել Ռուսաստանի իշխանություններին անհապաղ ազատ արձակել Կարա-Մուրզային, իսկ գերիների փոխանակման շուրջ Ռուսաստանի Դաշնության հետ բանակցող բոլոր պետություններին՝ Կարա-Մուրզային ներառել այդ փոխանակումների մեջ։
ԵԽԽՎ-ն նաև հարգել է Ալեքսեյ Նավալնիի հիշատակը, հայտարարել է, որ ռուսական պետությունն է կրում նրա մահվան ողջ պատասխանատվությունը և կոչ արել արմատական միջոցներ ձեռնարկել «Վլադիմիր Պուտինի տոտալիտար ռեժիմի» դեմ։
Միաժամանակ ԵԽԽՎ-ն կոչ է արել ԵՄ-ին և այլ երկրներին պատժամիջոցներ կիրառել Ալեքսեյ Նավալնիի հետապնդման, վատ վերաբերմունքի և մահվան համար անմիջականորեն պատասխանատուների նկատմամբ։
Բացի այդ, ասամբլեան կոչ է արել ԵՄ-ին և G7-ին ուժեղացնել պատժամիջոցները Ռուսաստանի դեմ՝ պատժամիջոցներ կիրառելով Մոսկվայի ֆոնդային բորսայի և «Ռոսատոմի» նկատմամբ, ինչպես նաև նվազեցնել նավթի գնի առաստաղը՝ նվազեցնելու նավթի եկամուտները, որոնք Ռուսաստանի համար եկամտի աղբյուր են:
Վեհաժողովը նաև հայտարարել է, որ ստեղծել է հաղորդակցության հարթակ Ռուսաստանի դեմոկրատական ուժերի հետ երկխոսության համար և կոչ է արել այդ կապակցությամբ հաստատել գլխավոր խոսնակի պաշտոնը։