Ապրիլի 26-ին Աղդամում տեղակայված Թուրքիա-Ռուսաստան համատեղ մոնիտորինգի կենտրոնը դադարեցրեց իր գործունեությունը։ Ըստ Turan-ի՝ փակման արարողությանը մասնակցել են Ադրբեջանի բանակի գլխավոր շտաբի պետ Քարիմ Վալիևը, Թուրքիայի և Ռուսաստանի դեսպանները։
Թուրքիա-Ռուսաստան համատեղ մոնիտորինգային կենտրոնի փակումը տեղի է ունեցել Ղարաբաղից ռուս խաղաղապահների դուրսբերման ֆոնին։ Ադրբեջանից ռուս խաղաղապահների դուրսբերումը սկսվել է ապրիլի 17-ին։
Թուրքիա-Ռուսաստան համատեղ մոնիտորինգի կենտրոնը ստեղծվել է 2021 թվականի հունվարի 30-ին Աղդամ քաղաքում՝ Թուրքիայի և Ռուսաստանի միջև ստորագրված հուշագրի հիման վրա։ Հուշագրում ասվում էր, որ կենտրոնը ստեղծվել է Ղարաբաղի շրջանում հրադադարի ռեժիմի մշտադիտարկման և իրավախախտումները կանխելու նպատակով։ Հաղորդվել է, որ կենտրոնում ընդհանուր առմամբ ծառայում է 120 մարդ, այդ թվում՝ 60 զինվոր երկու կողմերից։
