Եվրամիությունը շուտով կհայտարարի Ադրբեջանում ականազերծմանն աջակցելու իր նոր նախաձեռնության մասին։ Այս մասին հինգշաբթի լրագրողներին ասաց Ադրբեջանում Եվրամիության ներկայացուցչության ղեկավար, դեսպան Պյոտր Միխալկոն։
ԵՄ-ն Ադրբեջանի ականազերծման ոլորտում ամենամեծ դոնորներից մեկն է, ասել է նա։
Բացի ականազերծումից, ԵՄ-ն և Ադրբեջանը համագործակցում են տնտեսության, պարենային անվտանգության և ներքին տեղահանվածներին աջակցության ոլորտներում։
ԵՄ-ն և Ադրբեջանը մնում են սերտ գործընկերներ, և «մեր ակտիվ երկխոսությունը շարունակվում է», հավելել է ԵՄ առաքելության ղեկավարը։
Համագործակցության առաջնահերթ ուղղություններն են նաև էներգետիկայի և առևտրի ոլորտները։ Բացի այդ, կողմերը համագործակցում են կլիմայի փոփոխության հարցերի շուրջ, ինչը կարևոր թեմա է Բաքվում կայանալիք COP29 համաժողովի համատեքստում։
ԵՄ-ն պատրաստ է աջակցել Ադրբեջանին COP29-ի անցկացման հարցում և կիսել իր փորձն այս ուղղությամբ, ասել է Միխալկոն։
Նա ԵՄ-ն անվանել է Ադրբեջանի ամենաակտիվ գործընկերներից մեկը, որը հիմնված է ընդհանուր առաջնահերթությունների և արժեքների վրա։
