Բելառուսի նախագահն առաջարկում է Կովկասի տարածաշրջանի ծրագիր, որը նա քննարկել է Բաքու կատարած իր վերջին այցի ժամանակ։ Այս մասին նա ասել է այսօր պաշտոնական այցով Մինսկում գտնվող Ռուսաստանի Դաշնության նախագահ Վլադիմիր Պուտինի հետ հանդիպմանը։
«Ես հետաքրքիր առաջարկներ ունեմ մեր տարածաշրջանի և կովկասյան տարածաշրջանի համար, Ադրբեջան կատարած իմ այցի ընթացքում մենք շատ լրջորեն քննարկեցինք այդ ծրագրերը»,- Լուկաշենկոյի խոսքերն է մեջբերում ԲԵԼՏԱ պետական գործակալությունը։
Նա չասաց, թե որն է այս ծրագիրը։ Պաշտոնական Բաքուն մայիսի 20-21-ը Լուկաշենկոյի Բաքու կատարած այցի ընթացքում որեւէ ծրագրի քննարկման մասին տեղեկություն չի հրապարակել։
Բելառուսի ղեկավարը այցի արդյունքների մասին ճեպազրույցում ասել է, որ այդ հարցը Իլհամ Ալիևի հետ քննարկել է դեռևս Ղարաբաղյան Երկրորդ պատերազմից առաջ։
«Մենք քննարկել ենք տարածաշրջաններում անվտանգության հարցեր։ Իլհամ Հեյդար օղլուն ինձ մանրամասն տեղեկություններ է տվել այն մասին, թե ինչ է կատարվում այստեղ՝ ակտիվ շրջանում։ Եվ փառք Աստծո, ի դեմս Ադրբեջանի, այստեղ հայտնվեց շատ ուժեղ, նորմալ ղեկավար։ Դուք ի վիճակի եք վերահսկել կովկասյան տարածաշրջանը»,- ասել է Լուկաշենկոն։
