Հունիսի 4-ին Բաքվի ծանր հանցագործությունների դատարանում արհմիությունների ակտիվիստ Աֆիյադդին Մամեդովի գործով լսվել է տուժող Սաֆար Հուսեյնովի ցուցմունքը։
Նա պատմել է, որ դեպքի օրը ինքը փողոցով քայլելիս՝ նայելով իր հեռախոսին, բախվել է Մամեդովին։ Բանավոր ծեծկռտուքից հետո Մամեդովը դանակահարել է նրան։
Դրանից հետո դատավորը հարցրել է, թե մտադիր է արդյոք հաշտվել Մամեդովի հետ և հետ վերցնել բողոքը, Հուսեյնովը բացասական պատասխան է տվել։
Իր հերթին արհմիության ակտիվիստը Հուսեյնովին մեղադրել է ստելու մեջ։ Փաստորեն, Հուսեյնովը նրա վրա հարձակվել է ակտիվիստի տան դիմաց, ոչ թե քննչական նյութում նշված վայրում։
Մամեդովը նշել է, որ իրականում վիրավորվել է, քանի որ Հուսեյնովը հարվածել է դեմքին և կոտրել քիթը։ Բացի այդ, Մամեդովն ընկել է ու վնասել մեջքը։ Չնայած ստացած վնասվածքներին՝ Մամեդովին բժշկական օգնություն չի ցուցաբերվել։
Այս գործով հաջորդ նիստը նշանակված է հուլիսի 30-ին։
* «Աշխատավորների սեղան» այլընտրանքային արհմիությունների կոնֆեդերացիայի ղեկավար Աֆիյադդին Մամեդովը ձերբակալվել է սեպտեմբերի 20-ին իր տան դիմաց անհայտ անձի կողմից հարձակման ենթարկվելուց հետո։ Մամեդովը մեղադրվում էր իր վրա հարձակված անձին դանակահարելու մեջ (221-3-րդ հոդվածներ՝ խուլիգանություն, որը կատարվել է զենքի գործադրմամբ և 126.1-րդ հոդված՝ առողջությանը դիտավորությամբ ծանր վնաս պատճառելը)։
Հետագայում ավելի ծանր մեղադրանքներ են առաջադրվել 126.2.4 հոդվածներով (ընդհանուր վտանգավոր եղանակով դիտավորությամբ ծանր մարմնական վնասվածք հասցնելը) և 228.4 (զենքի ապօրինի շրջանառություն) հոդվածներով։ Նրան սպառնում է մինչև 11 տարվա ազատազրկում։ Իրավապաշտպանները Մամեդովին քաղբանտարկյալ են ճանաչել։
