Հունիսի 4-ին Սիրիայում տեղակայված ճամբարներում պահված Ադրբեջանի 6 քաղաքացիներ, այդ թվում՝ 5 երեխա և 1 կին, հայրենադարձվել են։
Այս մասին տեղեկություն է տարածել Ադրբեջանի արտաքին գործերի նախարարության մամուլի ծառայությունը։
Տեղեկատվության մեջ նշվում է, որ համապատասխան միջոցառումներ են իրականացվելու հայրենադարձների սոցիալական վերականգնման և հասարակության մեջ վերաինտեգրման ուղղությամբ։
«Ադրբեջանի կառավարությունը կշարունակի անհրաժեշտ միջոցներ ձեռնարկել օտարերկրյա պետությունների տարածքում զինված բախումների զոհ դարձած Ադրբեջանի քաղաքացիների հայրենադարձության համար», – նշում է նախարարությունը։
Ավելի վաղ՝ մայիսի 14-ին, իրենց երկիր էին հայրենադարձել Ադրբեջանի 8 քաղաքացիներ, այդ թվում՝ 5 երեխա և 3 կին, ովքեր մեկնել էին Սիրիայի հակամարտող շրջաններ։
Պաշտոնական տեղեկատվության համաձայն՝ Իրաքից և Սիրիայից Ադրբեջան է հայրենադարձվել ընդհանուր առմամբ 459 քաղաքացի, այդ թվում՝ 411 երեխա և 38 կին։