Հունիսի 5-ին Ադրբեջանի և Հունգարիայի արտգործնախարարները համատեղ մամուլի ասուլիս են անցկացրել՝ հիմնվելով Ռազմավարական երկխոսության 2-րդ նստաշրջանի արդյունքների վրա։
Հանդիպման հիմնական թեմաներն էին առեւտրատնտեսական հարաբերությունների զարգացումը, էներգետիկ խնդիրները, փոխադարձ ներդրումները։
Միաժամանակ անդրադարձ է կատարվել Ադրբեջան-Հայաստան խաղաղ բանակցություններին և Հունգարիայի քաղաքականության առաջնահերթություններին Եվրամիությունում վեցամսյա նախագահության ընթացքում։
Բանակցությունների արդյունքների համաձայն՝ ստորագրվել է երկու երկրների միջև ռազմավարական երկխոսության ամփոփիչ արձանագրություն և երկու արտգործնախարարությունների միջև հյուպատոսական համագործակցության մասին հուշագիր։ Այս մասին ամփոփիչ մամուլի ասուլիսում ասել է Ադրբեջանի արտգործնախարար Ջեյհուն Բայրամովը։
Նրա խոսքով՝ Ադրբեջանի և Հունգարիայի միջև ապրանքաշրջանառության ծավալների զգալի աճ կա, և կողմերը մտադիր են էլ ավելի մեծացնել այդ ծավալը։ Համագործակցությունը քաղաքականության, տնտեսության, տրանսպորտի, առևտրի, էներգետիկայի, հումանիտար և այլ ոլորտներում շարունակվում է աճող տողով։
«Հունգարիան ադրբեջանական գազի գնորդների թվում է և ունի 8,9 տոկոս բաժնետոմս Բաքու-Թբիլիսի-Ջեյհան նախագծում։ Բացի այդ, «Շահ Դենիզ» դաշտի մասնակիցների թվում է Հունգարիան։
Նախարարի խոսքով՝ հունգարական ընկերություններն ակտիվորեն ներգրավված են Ադրբեջանի ազատագրված տարածքների վերականգնման գործում, մասնավորապես՝ վերակառուցում են Ջաբրայիլի շրջանի Սոլթանլի գյուղը։
Հունգարիայում տարեցտարի ավելանում է ադրբեջանցի ուսանողների թիվը։ «Մոտ 1300 ադրբեջանցի ուսանող արդեն օգտվել է Հունգարիայի կառավարության կողմից իրականացվող կրթաթոշակային ծրագրից։ Վերջերս ծրագրի տեւողությունը երկարացվել է»։
Հունգարիայի արտաքին գործերի և առևտրի նախարար Պետեր Սիյարոն, իր հերթին, ասել է, որ հուլիսի 1-ից Հունգարիան կկատարի Եվրամիության նախագահի իր պարտավորությունները։
Հունգարիայի նախագահության ընթացքում Եվրամիության գլխավոր առաջնահերթությունը կլինի կազմակերպության ընդլայնումը Արեւմտյան Բալկանյան երկրների ուղղությամբ, անօրինական միգրացիայի դեմ պայքարը եւ Եվրամիության մրցունակության բարձրացումը։
Խոսելով նոր աշխարհակարգի մասին՝ նախարարն ասաց, որ աշխարհը կրկին կարելի է բաժանել քաղաքական բլոկների։ Ուկրաինայի պատերազմը կարող է հանգեցնել սրան, որը խնդիր կլինի բոլորի համար։
Անդրադառնալով Ադրբեջանի հետ երկկողմ հարաբերություններին՝ նախարարը նշել է, որ Բուդապեշտը շահագրգռված է Բաքվի հետ ռազմավարական հարաբերությունների ամրապնդմամբ։
«Ադրբեջանը կարևոր դեր է խաղում Եվրոպայի, հատկապես Հունգարիայի էներգետիկ անվտանգության մեջ»,- ասել է Սիյարտոն։
