Հունիսի 18-ին Թուրքիայի նախագահ Էրդողանը և Հայաստանի վարչապետ Փաշինյանը հեռախոսազրույց են ունեցել։
Թուրքիայի նախագահի մամուլի ծառայությունից հայտնում են, որ Փաշինյանը շնորհավորել է Էրդողանին Զոհաբերության տոնի առթիվ, իսկ Էրդողանը շնորհավորել է Փաշինյանին՝ գալիք Պայծառակերպության տոնի առթիվ։
Էրդողանը ցավակցություն է հայտնել Փաշինյանին՝ Հայաստանի հյուսիսային շրջաններում տեղի ունեցած բնական աղետի կապակցությամբ։
«Զրույցի ընթացքում երկու ղեկավարներն էլ ընդգծել են իրենց քաղաքական կամքը՝ առանց նախապայմանների Թուրքիայի և Հայաստանի միջև հարաբերությունների լիարժեք կարգավորման համար։ Այս համատեքստում առաջնորդները նշել են երկու երկրների հատուկ ներկայացուցիչների միջև բանակցությունների շարունակման կարևորությունը և հաստատել մինչ այժմ համաձայնեցված հարցերը։
Ղեկավարները գոհունակությամբ նշել են նաև Թուրքիայի և Հայաստանի բարձրաստիճան պաշտոնյաների միջև ընթացող երկխոսությունը»,- ասված է թուրքական կողմի հայտարարության մեջ։
