Երկուշաբթի օրը Միացյալ Նահանգները կտրականապես հերքել է Կրեմլի այն պնդումները, թե իրենք առնչություն ունեն Ղրիմի վրա հրթիռային հարձակմանը։
«Եթե Ռուսաստանը դադարեցներ ուկրաինական ինքնիշխան տարածքների օկուպացիան, ապա կարող էր այսօր ավարտել այս պատերազմը և վերջ տալ պատերազմի պատճառած տառապանքներին», – ասել է Պետդեպարտամենտի ներկայացուցիչ Մեթյու Միլլերը՝ պատասխանելով Turan-ի թղթակցի հարցերին ճեպազրույցում։
«Մենք ցավում ենք քաղաքացիական բնակչության ցանկացած զոհի համար: Մենք զենք ենք տրամադրում Ուկրաինային, որպեսզի նա կարողանա պաշտպանել իր ինքնիշխան տարածքը ագրեսիայից։ Դա ներառում է Ղրիմը, որը Ուկրաինայի մաս է կազմում»,- հավելել է Միլլերը։
Ռուս պաշտոնյաները երկուշաբթի օրը հայտնել են, որ հարձակման ժամանակ Սևաստոպոլի լողափերից մեկում բեկորների ընկնելու հետևանքով չորս մարդ է զոհվել, մոտ 150 մարդ վիրավորվել է: Ռուսաստանի պաշտպանության նախարարությունը մեղադրել է ԱՄՆ-ին ուկրաինացիներին ATACMS հրթիռներ տրամադրելու մեջ։
Միլլերն ասել է, որ Ռուսաստանի պնդումներն անհիմն են և կեղծ։
«Հիշում եք, որ Մոսկվայի «Կրոկուս» համերգասրահում տեղի ունեցած ահաբեկչությունից հետո նրանք մեղադրեցին ԱՄՆ-ին, թեև ԱՄՆ-ն էր, որ զգուշացրեց նրանց մոտալուտ ահաբեկչության մասին», – հավելել է Միլլերը։
