Հունիսի 26-ին Ժնևում ՄԱԿ-ի գրասենյակում ՄԱԿ-ի Մարդու իրավունքների խորհրդի 56-րդ նստաշրջանի շրջանակում COP29-ի նախօրեին քննարկվել են Ադրբեջանում խոսքի ազատության սահմանափակումները և լրագրողների հետապնդումները։
Լսումները կազմակերպել են Եվրոպայում գործող ադրբեջանական հասարակական կազմակերպությունները՝ Լրագրողների ազատության և անվտանգության ինստիտուտը և Մարդու իրավունքների ինստիտուտը:
«Զուգահեռ միջոցառմանը վերանայվել են Ադրբեջանում վերջին օրերին լրագրողների զանգվածային ձերբակալությունների ավելի լայն հետեւանքները երկրում խոսքի եւ կարծիքի ազատության համար։ Միևնույն ժամանակ, ասվեց, որ այս գործողությունները այլախոհությունը ճնշելու և տեղեկատվությունը վերահսկելու համակարգված ջանքերի մի մասն են: Մենք այս հարցը կապեցինք COP29-ի հետ, հետաքննեցինք բռնաճնշումների ազդեցությունը քաղաքացիական ակտիվիզմի վրա, ներառյալ տեղական և միջազգային ակտիվիստների կարողությունը՝ աջակցելու կլիմայի փոփոխության դեմ պայքարին ուղղված կարևոր քայլերին»,- ասել է RATI-ի տնօրեն Էմին Հուսեյնովը։
RATI-ի տվյալներով՝ ներկայումս ադրբեջանական բանտերում կա ավելի քան 30 լրագրող, և այս ցուցանիշով երկիրը Եվրախորհրդի երկրների շարքում «առաջատարն» է՝ առաջ անցնելով Թուրքիայից։
Նրա խոսքով, միջոցառմանը հրավիրված են եղել նաեւ ադրբեջանական մամուլի ներկայացուցիչներ, որոնց լրագրողները գտնվում են բանտում։ Toplum TV-ն ներկայացնում էր փաստաբան Սամադ Ռահիմլին, իսկ Kanal 13-ը՝ Անար Օրուջովը։
Նրանք խոսում էին այն մասին, որ իրենց գործընկերները հետապնդվում են կեղծ մեղադրանքներով։
RATI-ի ներկայացուցիչ Կարինա Պավլովան նշել է, որ Ադրբեջանում կա 300 քաղբանտարկյալ, որոնցից 30-ը լրագրողներ են։ Նա ուշադրություն է հրավիրել բանտարկված ակտիվիստ Ֆամիլ Խալիլովի և լրագրող Հաֆիզ Բաբալիի դեպքերի վրա՝ սահմանափակ միջոցներ ունեցող անձինք, որոնք տառապում են բանտում բժշկական օգնության բացակայության պատճառով։
IHI-ից Դիանա Նազարեցը ուշադրություն է հրավիրել իրավապաշտպան Անար Մամեդլիի ձերբակալության վրա։
Նա հիշեցրել է Ադրբեջանի հանձնառությունը՝ կատարելու իր միջազգային պարտավորությունները մարդու իրավունքների ոլորտում՝ որպես երկիր, որը կհյուրընկալի COP29-ը։
«Չկա կլիմայական արդարադատություն առանց մարդու իրավունքների»,- ասել է նա։
Հուսեյնովի խոսքով, լսումներին մասնակցել են ՄԱԿ-ի Ժնևի գրասենյակում ավելի քան 40 երկրների ներկայացուցչությունների աշխատակիցներ։