Երկուշաբթի օրը Միացյալ Նահանգները հայտարարել է, որ Ադրբեջանի հետ բարձր մակարդակի բանակցությունների ընթացքում «շարունակելու է կենտրոնանալ քաղբանտարկյալների խնդրի վրա», հաղորդում է Turan-ի Վաշինգտոնի թղթակիցը։
«Սա երկար գործընթաց է և մեզանից մշտական փոխգործակցություն է պահանջում», – վերջերս ասել է Պետդեպարտամենտի մամուլի քարտուղարի առաջին տեղակալ Վեդանտ Պատելը` ի պատասխան Բաքվի հետ բարձր մակարդակի հարաբերությունների մասին Turan-ի հարցին:
«Ես ակնկալում եմ, որ և՛ պետքարտուղարը, և՛ պետքարտուղարի օգնականը (Ջեյմս) Օ՛Բրայենը և մյուսները կշարունակեն կենտրոնանալ դրա վրա»,- հավելել է Փաթելը։
Նախագահ Իլհամ Ալիևի հետ իր վերջին հեռախոսազրույցում Բլինկենը կոչ է արել Ադրբեջանին կատարել մարդու իրավունքների ոլորտում ստանձնած միջազգային պարտավորությունները և ազատ արձակել բոլոր անարդարացիորեն ձերբակալվածներին։ «Նա կոչ է արել Ադրբեջանին դա անել որքան հնարավոր է շուտ», – ասվում է Պետդեպարտամենտի հունիսի 20-ի տեղեկատվության մեջ։
Պետքարտուղարի օգնական Օ’Բրայենը, ով անցյալ շաբաթ այցելեց Ադրբեջան, նույնպես Կոնգրեսին ասաց, որ Ալիևի հետ խոսելու է մարդու իրավունքների պահպանման կարևորության մասին։ «Դա ընդհանուր քննարկման թեմա է… և ես անհամբեր սպասում եմ նրա հետ այդ խոսակցությանը», – ասաց նա:
Վերջերս Ադրբեջանի կառավարությանը մեղադրում էին լրագրողների և քաղաքացիական հասարակության ակտիվիստների նկատմամբ բռնաճնշումների ավելացման մեջ։ Իրավապաշտպան կազմակերպությունները անցյալ տարվա աշնանից արձանագրել են լրագրողների և ակտիվիստների ձերբակալությունների կամ դատապարտման առնվազն 25 դեպք: Գրեթե բոլորը դեռ բանտում են։
