Ադրբեջանը միշտ պատրաստ է եղել Հայաստանի հետ բանակցություններին Ռուսաստանում և այլ հարթակներում։ Այս մասին ՏԱՍՍ-ին ասել է Ադրբեջանի արտաքին գործերի նախարարության մամուլի քարտուղար Այխան Հաջիզադեն՝ մեկնաբանելով, որ Մոսկվան պատրաստ է կողմերի միջև հանդիպում կազմակերպել։
«Ադրբեջանական կողմը միշտ պատրաստ է եղել Ռուսաստանում և այլ վայրերում հայկական կողմի հետ բանակցությունների»,- ասել է Հաջիզադեն։
Նա արձագանքել է Ռուսաստանի արտաքին գործերի նախարարության ներկայացուցիչ Մարիա Զախարովայի այսօրվա հայտարարությանը Բաքվի և Երևանի ներկայացուցիչների միջև բանակցությունների հարթակ տրամադրելու Ռուսաստանի պատրաստակամության վերաբերյալ։
Մարիա Զախարովան նշել է, որ Ռուսաստանի Դաշնությունը կողմերի միջև հավասարակշռված խաղաղության համաձայնագրի կնքումը անփոխարինելի հիմք է համարում տարածաշրջանում անբաժանելի անվտանգության ճարտարապետություն կառուցելու համար։
