Շուվելանի մեկուսարանում կալանավորված նախկին դիվանագետ Էմին Իբրահիմովը 9 օր է՝ հացադուլ է անում՝ բողոքելով իր անհիմն ձերբակալության դեմ։ Նա մտադիր է հացադուլը շարունակել այնքան ժամանակ, քանի դեռ քրեական հետապնդումը չի դադարեցվել, Turan-ին հայտնել են Իբրահիմովի հարազատները։
Իր հերթին մարդու իրավունքների պաշտպան Ռուֆաթ Սաֆարովը հայտնել է, որ Իբրահիմովին դատապարտյալները սպառնում են նախնական մեկուսարանի վարչակազմի հանձնարարությամբ։
Հասարակության ուշադրությունը գրավելուց հետո Իբրահիմովին տեղափոխել են 2 հոգանոց խուց։ Սակայն դա բավարար չէ, նրան պետք է տեղափոխել բժշկասանիտարական բաժին և ենթարկել բժշկական հսկողության, կարծում է իրավապաշտպանը։
«Էմին Իբրահիմովը «խղճի բանտարկյալ» է։ Նա ձերբակալվել է խոսքի ազատության համատեքստում։ Նրան խոշտանգել են և դաժան վերաբերմունքի ենթարկել իր ազատ կարծիքի համար: Էմին Իբրահիմովի օրինակով քաղբանտարկյալների նկատմամբ ցուցաբերած վերաբերմունքը վկայում է այն մասին, որ իրավական նիհիլիզմը Ադրբեջանում իր գագաթնակետին է։ Իբրահիմովի կյանքի ու առողջության պատասխանատվությունն ուղղակիորեն դրված է երկրի ղեկավարության վրա»,- ասել է Սաֆարովը։
Էմին Իբրահիմովը ձերբակալվել է հուլիսի 22-ին։ 2 օր անց նրան մեղադրանք է առաջադրվել Գարաչուխուր բնակավայրի բնակիչ Քամալ Շուկուրովին դանակահարելու համար (ՔՕ 126.2.4 հոդված՝ զենքի գործադրմամբ դիտավորությամբ առողջությանը վնաս պատճառելը) և 221.1 հոդվածը (խուլիգանություն)։ Նա հերքեց այս մեղադրանքները և քրեական գործը կապեց իշխանության հասցեին իր քննադատության հետ։
Նախկին դիվանագետ Էմին Իբրահիմովը դիվանագիտական ծառայության մեջ է եղել 2007-2020 թվականներին։ 2012-2016 թվականներին եղել է ԱՄՆ-ում Ադրբեջանի դեսպանատան երկրորդ քարտուղարը, իսկ 2016-2020 թվականներին՝ Ուրուգվայի գործերի ժամանակավոր հավատարմատարը։
2020 թվականի մարտի 13-ին նա հրաժարականի դիմում է ներկայացրել Արտաքին գործերի նախարարություն՝ ի նշան բողոքի երկրում ընտրական իրավունքների և ազատությունների ճնշման դեմ և թողել է դիվանագիտական գործունեությունը։ Դրանից հետո նա քննադատել է Ադրբեջանի իշխանություններին քաղաքացիների իրավունքների ոտնահարման ու խարդախության համար, ելույթ է ունեցել ԶԼՄ-ներում ու սոցիալական ցանցերում։
