«Երեքշաբթի օրը Միացյալ Նահանգները քննադատել է Մոնղոլիայի իշխանություններին ՌԴ նախագահ Վլադիմիր Պուտինի հանդիսավոր ընդունելության և Միջազգային քրեական դատարանի որոշմամբ նրան չկալանավորելու համար։
«Մենք կարծում ենք, որ ոչ մի երկիր չպետք է Պուտինին հարթակ տրամադրի Ուկրաինայի դեմ նրա ագրեսիվ պատերազմը խթանելու համար»,- ճեպազրույցի ժամանակ պատասխանելով TURAN-ի հարցին՝ ասել է Պետդեպարտամենտի ներկայացուցիչ Մեթյու Միլլերը։
«Մենք ակնկալում ենք, որ Մոնղոլիան հավատարիմ կմնա իր պարտավորություններին և կպահպանի ՄԱԿ-ի կանոնադրության սկզբունքները, ներառյալ ինքնիշխանությունն ու տարածքային ամբողջականությունը», – ասել է Միլլերը:
Միաժամանակ նա ընդունել է Մոնղոլիայի աշխարհաքաղաքական իրավիճակը։ «Մենք հասկանում ենք Մոնղոլիայի իրավիճակը, այն խրված է երկու մեծ հարևանների միջև, բայց մենք կարևոր ենք համարում, որ այն աջակցում է աշխարհում օրենքի գերակայությանը»,- ասել է նա։
Միջազգային քրեական դատարանի որոշման համաձայն՝ Պուտինը մեղադրվում է Ուկրաինայից հարյուրավոր երեխաների անօրինական արտաքսման մեջ։ Չնայած Միջազգային քրեական դատարանի Հռոմի կանոնադրության վավերացմանը, Մոնղոլիան հրաժարվել է կատարել Պուտինի ձերբակալության հրամանը, քանի որ Ուլան Բատորի իշխանությունները ասում են, որ կախված են ռուսական էներգակիրներից:
